फोंडा: मडगावात गेल्या आठवड्यात दोन जुन्या जीर्ण इमारतींचा काही भाग कोसळला, सुदैवाने जीवितहानी झाली नाही, तशीच स्थिती फोंड्याची असून फोंडा शहरातही काही जुन्या जीर्ण इमारती आहेत, ज्या कोसळण्याचा धोका असल्याचा दावा करण्यात येत आहे. या इमारती त्वरित हटवाव्यात आणि लोकांच्या डोक्यावर असलेली टांगती तलवार दूर करावी, अशी मागणी फोंडावासीयांनी केली आहे.

फोंड्यातील तिस्क ते वरचा बाजार बेतोडा - उसगाव तिठ्यापर्यंत अनेक जुन्या आणि जीर्ण इमारती आहेत. या इमारतींचा धोका ओळखून त्यातील दुकानदार आणि रहिवाशांनी या इमारती सोडल्या आहेत. मात्र, त्या इमारती अजूनही तशाच उभ्या आहेत.

तिस्क - फोंडा येथील पाडण्यात आलेल्या शास्त्री सभागृह इमारतीसमोरील खासगी इमारत, कॅनरा बँकेची शाखा असलेली भली मोठी इमारत, वरचा बाजार भागातील जुन्या दुकानांची इमारत तसेच उसगाव - बेतोडा तिठ्यावरील जुना बाजार विद्यालयाची जीर्ण इमारत सध्या धोकादायक ठरली आहे.

फोंडा शहर हे आकाराने लहान असून दुतर्फा इमारती आहेत. त्यामुळे या जुन्या जीर्ण इमारतींचा धोका व्यक्त करण्यात येत आहे. या इमारतींमधील बहुतांश खासगी इमारती असून लोकांच्या जीविताला धोका असल्याने या इमारती त्वरित पाडण्याची कार्यवाही व्हावी, अशी मागणी होत आहे.

फोंडा पालिकेकडून नोटिसा

फोंडा पालिकेने या धोकादायक इमारतींच्या मालकांना नोटिसा पाठवल्या आहेत. या इमारती लोकांसाठी धोका असल्याने संबंधितांनी त्वरित पाडाव्यात आणि हा धोका दूर करावा, असे या नोटिशीत म्हटले आहे.

१५ इमारती धोकादायक

फोंडा शहर तसेच लगतच्या भागातील एकूण पंधरा इमारती धोकादायक स्थितीत आहेत.

यातील काही पोर्तुगीजकालीन इमारती असून बहुतांश इमारती खाली करण्यात आल्या आहेत, तर काही खाली करण्याच्या मार्गावर आहेत.

फोंड्यातील बऱ्याच इमारती या पोर्तुगीजकालीन असून त्यांचे ‘स्ट्रक्चरल ऑडिट’ करण्याची आवश्‍यकता आहे.