Goa Police Arrests Notorious Drug Peddler: गोवा पोलिसांच्या अमली पदार्थ विरोधी पथकाने (ANC) कुख्यात अंमली पदार्थ विक्रेता प्रसाद वाळके याला अटक केली. आसगाव, बार्देश येथे ही कारवाई करण्यात आली आहे. वाळके याच्याकडून हायड्रोपोनिक वीड, एमडीएमए आणि एक्स्टसी पावडर असे एकूण 4 लाख 20 हजाराचे अमली पदार्थ जप्त करण्यात आले आहेत.

2018 मध्ये वाळके याला एनसीबी गोवा युनिटने एलएसडी, कोकेन, एक्स्टसी आणि गांजा यांसारख्या प्रतिबंधित वस्तू बाळगल्याबद्दल अटक केली होती.

त्यानंतर 2021 मध्ये अभिनेता सुशांत सिंग रजपूतच्या मृत्यूच्या पाठपुराव्याच्या तपासादरम्यान, एनसीबीने व्यावसायिक प्रमाणात एलएसडी ब्लॉट्स ठेवल्याबद्दल वाळके याला पुन्हा अटक केली होती.

वाळके हा एएनसीच्या रडारवर होता. विश्वसनीय माहितीच्या आधारे पाळत ठेऊन एनएनसी अधिकाऱ्यांनी सापळा रचत त्याला रंगेहाथ आसगाव येथून अटक केली. तिथे तो ड्रग्जचा सौदा करण्यासाठी आला होता.

LPSI प्रियंका गारोडी यांनी एएनसीचे पोलिस निरीक्षक सजीथ पिल्लई यांच्या देखरेखीखाली पीसीएस नितेश मुळगावकर, मंदार नाईक, सुमित मुटकेकर, साईराज नाईक, संदेश वोल्वोईकर, पीसी ड्रायव्हर कुंदन पाटेकर यांनी छापा टाकला. याप्रकरणी अधिक तपास पीएसआय प्रवीण सिमेपुरुषकर करीत आहेत.