म्हापसा: गिरकरवाडा, हरमल येथील बेकायदा बांधकामांना जबाबदार धरण्यात आल्याने हरमल पंचायत सदस्य बर्नार्ड फर्नांडिस यांना पाच वर्षांसाठी निवडणूक लढविण्यास अपात्र ठरविण्याचा पंचायत संचालनालयाने दिलेला आदेश उत्तर गोवा प्रधान जिल्हा न्यायालय, पणजी यांनी कामय ठेवला आहे.

फर्नांडिस यांनी उत्तर गोवा प्रधान जिल्हा न्यायालयासमोर दिवाणी पुनरीक्षण अर्ज दाखल करून पुढील पाच वर्षांसाठी पंचायत निवडणूक लढवण्यास अपात्र ठरवणाऱ्या पंचायत संचालकांच्या आदेशाला स्थगिती देण्याची मागणी केली होती.

फर्नांडिस हे हरमल गावचे सरपंच होते आणि प्रभाग क्रमांक ४(गिरकरवाडा)मधून पंचायत सदस्य म्हणून निवडून आले होते. जिथे ‘नो-डेव्हलपमेंट झोन’ (एनडीझेड)मध्ये सुमारे १८७ संरचना समोर आल्या होत्या. त्यापैकी जवळपास ६१ बांधकामे कोणताही बांधकाम परवाना, परवानगी आणि भोगवाटा प्रमाणपत्राशिवाय अस्तित्वात असल्याचे आढळून आले.

६१पैकी ३३ संरचनेचा वापर व्यावसायिक कारणांसाठी करण्यात आला. फर्नांडिस यांनी सुरवातीला सरपंचपदाचा राजीनामा दिली होता. मात्र, त्यांनी राजीनामा मागे घेतला. त्यानंतर पंचायत संचालकांनी त्यांना पदावरून हटवले. फर्नांडिस यांच्या पचंयात सदस्याच्या कार्यकाळात १८७ (कमी नाही) बेकायदा बांधकामे उभारण्यात आली.

गोवा खंडपीठाने दिलेले निर्देश पाहता, पंचायत संचालकांनी फर्नांडिस यांना कारणे दाखवा नोटीस बजावली. त्यांनी उत्तरात म्हटले की, बेकायदेशीर बांधकामांची ओळख पटवणारा पंचायतीचा अहवाल चुकीचा आहे. तो पंचायत संचालनालयाने विचारात घेऊ नये. फर्नांडिस यांनी अहवालात दाखविलेल्या ३३ पैकी २८ संरचना त्यांच्या मालकीच्या नसल्याचे सांगत अहवालाला आव्हान दिले.

पुरावा सादर केला नाही

१९९१च्या सीआरझेड अधिसूचनेपूर्वी त्यांच्या वडिलांनी बहुतेक बांधकाम केले होते आणि काही हरमल ग्रामपंचायत अस्तित्वात येण्यापूर्वीच बांधल्या गेल्या होत्या, असेही म्हणणे सादर केले. सर्वेक्षणाच्या आराखड्यात सदर रचना दाखविण्यात आल्याचा दावाही त्यांनी केला. परंतु, फर्नांडिस हे बांधकामांची कायदेशीरता दर्शविणारा एकही कागदोपत्री पुरावा सादर करू शकले नाहीत.