Goa Politics: दीपक पाऊसकर यांनी दीड वर्षापूर्वी सार्वजनिक बांधकाम खात्यात नोकरभरती केली होती. त्यावेळी त्यात मोठा भ्रष्टाचार आणि घोटाळा झाला, असा आरोप करणारे गोवा फॉरवर्डचे अध्यक्ष विजय सरदेसाई यांनी नीलेश काब्राल यांच्या अपारदर्शी नोकरभरती संदर्भात आज एकदम ‘यू टर्न’ घेऊन ही नोकरभरती प्रक्रिया करताना काब्राल यांनी कुठलाही भ्रष्टाचार केलेला नसून ते ‘मिस्टर क्लीन’ आहेत, असे म्हणत ही प्रक्रिया मागच्या प्रमाणे कुणी रद्द केल्यास आम्ही ते खपवून घेणार नाही, अशा शब्दांत काब्राल यांना प्रशस्तिपत्र दिले.

या नव्या राजकीय घडामोडींबद्दल त्यांच्या पक्षाची भूमिका जाणून घेण्यासाठी त्यांच्याशी संपर्क साधला असता ते म्हणाले, कोणाला मंत्रिपदी ठेवावे आणि कुणाला हटवावे हा भाजपचा अंतर्गत प्रश्र्न आहे. आमचे त्याच्याशी काही देणे घेणे नाही. मात्र मी एवढेच सांगू शकतो, काब्राल हे नोकरी देण्यासाठी पैसे घेणारे नाहीत आणि नव्याने मंत्री झालेले आलेक्स सिकेरा हेही पैसे घेणारे नाहीत.

या नोकरभरतीवेळी काब्राल यांनी विजय सरदेसाई यांनी शिफारस केलेल्या 3 जणांना नोकऱ्या दिल्या आहेत. स्वतः सरदेसाई यांनीच ‘गोमन्तक’ला ही माहिती दिली. माझ्या एकाही उमेदवाराकडून त्यांनी पैसे घेतलेले नाहीत, असेही त्यांनी सांगितले.

म्हणून काब्राल यांचा बळी: सिक्वेरा यांना मंत्री करण्यासाठी कुणालातरी पदावरून उतरविण्याची गरज होती. त्यात काब्राल यांचा बळी गेला. वास्तविक काब्राल यांनी तीन रेषीय प्रकल्प असो किंवा रेल्वे मार्ग दुपदरीकरण भाजपला नेहमीच पाठिंबा दिला. पण ते मऊ पडल्याने शेवटी त्यांचेच मंत्रिपद काढून घेतले गेले.,असे सरदेसाई म्हणाले.

हा ‘एम फॅक्टर’ !: सिक्वेरांना मंत्रिपद दिल्याबद्दल सरदेसाई यांना त्यांची प्रतिक्रिया विचारली असता, हा ‘एम फॅक्टर’ आहे, असे ते म्हणाले, सिक्वेरा यांना ‘मिनिस्ट्री’ मिळाली, अन्य फुटलेल्यांना दुसऱ्या तऱ्हेचे ‘एम’ मिळाले असे ते म्हणाले.