Mapusa News : म्हापसा मार्रा-पिळर्ण येथील हॉरिझन्स आझुरा प्रकल्पातील काही व्हिलांचे मालक असलेले नरोत्तम सिंग उर्फ निम्स धिल्लन (७७) यांचा मृतदेह संशयास्पद स्थितीत आढळला होता.

याप्रकरणी पर्वरी पोलिसांनी जितेंद्र साहू (३२) व नीतू राहुजा (२२) दोघेही रा.भोपाळ यांना अटक केली असून, संशयितांकडून पोलिसांनी ४७.८२ लाखांचा मुद्देमाल जप्त केला.

या दोघा संशयितांना आज सोमवारी (ता.५) दुपारी म्हापसा न्यायालयात हजर केले असता, न्यायालयाने त्यांना १० दिवसांची पोलिस कोठडी सुनावली. दरम्यान, धिल्लन हे पंजाबच्या एका माजी मुख्यमंत्र्यांचे नातेवाईक होते.

प्राप्त माहितीनुसार, रविवारी (ता.४) सकाळी धिल्लन हे आपल्या व्हिलातील बेडवर निपचित आढळले होते. त्यांच्या चेहऱ्यावर व शरीरावर काही जखमा होत्या. तसेच त्यांच्या अंगावरील सुवर्णलंकार व मोबाईल फोन गायब होता.

तिसऱ्याचा शोध सुरू

या संशयितांना नवी मुंबई गुन्हे शाखाच्या पथकाच्या सहाय्याने वाशी-मुंबई टोलनाक्यावर अडवून जितेंद्र व नीतू यांना ताब्यात घेण्यात आले.

त्यांच्याकडून चोरीचा ४७.८२ लाख रुपयांचा मुद्देमाल जप्त केला. त्यांचा मित्र असलेला तिसरा साथीदार संशयित कुणालचा सध्या पोलिस शोध घेताहेत.