सासष्टी: नुवे येथील फादर आग्नेल शिक्षण संस्था ते होंडा शोरूम सर्कलपर्यंतच्या राष्ट्रीय महामार्ग ६६ चे रुंदीकरण करण्याचा प्रस्ताव आहे. मात्र, याला स्थानिकांचा विरोध आहे. या रुंदीकरणामुळे काही घरे मोडावी लागतील, तर काही घरांचे प्रवेशद्वार थेट रस्त्याला भिडतील. शिवाय या रस्त्याच्या समांतर पश्र्चिम बगल दुपदरी रस्ता असल्याने या रस्त्याचा वापर मोठ्या प्रमाणात होत नाही.

कार्मेल महाविद्यालय ते होंडा शोरूम सर्कलपर्यंतचा रस्ता अगदी अरुंद असल्याने व रस्त्यालगत घरे व इमारती असल्याने या भागाचे रुंदीकरण कठीणच असल्याचे स्थानिकांचे म्हणणे आहे.

नुवे येथील नागरिकांनी दक्षिण गोव्याचे खासदार कॅप्टन विरियातो फर्नांडिस यांची भेट घेतली व त्यांच्या कानावर ही बाब घातली.

या रस्त्याच्या रुंदीकरणाच्या अंतिम निर्णयापूर्वी सार्वजनिक बांधकाम खात्यातर्फे पाहणी व सर्वेक्षण करण्यात येईल, असे खासदार कॅप्टन विरियातो फर्नांडिस यांनी नागरिकांना सांगितले.

या बैठकीवेळी दक्षिण गोवा जिल्हाधिकारी आश्वीन चंद्रू (आयएएस) उपस्थित होते. त्यांनीसुद्धा स्थानिकांचे म्हणणे शांतपणे ऐकून घेतले, असे एवर्सन वालेस यांनी सांगितले.