Sunburn Festival 2024 Petition

पणजी: राज्यात दरवर्षी होणाऱ्या सनबर्न ईडीएम महोत्सवाला धारगळला परवानगी देण्यास स्थानिकांचा जोरदार विरोध असतानाही पंचायतीने घेतलेल्या मंडळ बैठकीत तात्पुरता परवाना किंवा ना हरकत दाखला (एनओसी) देण्याचा ठराव संमत झाला. या निर्णयाला भरत नारायण बागकर यांनी नव्याने याचिका सादर केली आहे. या याचिकेवरील सुनावणी यापूर्वी उच्च न्यायालयात प्रलंबित असलेल्या सनबर्न महोत्सवासंदर्भात याचिकेवरील सुनावणीवेळी ९ रोजी एकत्रित घेण्यात येणार आहे.

उच्च न्यायालयात प्रलंबित असलेल्या जनहित याचिकेवरील मागील सुनावणीवेळी सरकारने तसेच धारगळ पंचायतीने सनबर्न ईडीएम महोत्सवाला परवानगी दिलेली नाही, असे सांगितले होते. या महोत्सवासंदर्भात सरकार किंवा पंचायत काय निर्णय घेते यासाठी खंडपीठाने त्यावरील सुनावणी ९ डिसेंबरपर्यंत तहकूब केली होती. धारगळ पंचायतीने २ डिसेंबरला घेतलेल्या पंचायत मंडळाच्या बैठकीत ९ पंचसदस्यांपैकी ५ जणांनी ना हरकत परवाना किंवा तात्पुरता परवाना देण्यास संमती दर्शविली. या निर्णयाची प्रत धारगळ पंचायतीकडे मागूनही ती दिली जात नाही. त्यामुळे हा निर्णय रद्द करण्याचे निर्देश द्यावेत, अशी विनंती याचिकेत करण्यात आली आहे.

धारगळ पंचायतीने २९ नोव्हेंबर रोजी ग्रामसभा बोलावली होती. त्यावेळी धारगळ पंचायत क्षेत्रात सनबर्न आयोजनास एकमताने लोकांनी विरोध करण्याचा ठराव घेतला होता. या ग्रामसभेला ९२ जण उपस्थित राहिले होते. १ डिसेंबर रोजी विरोध दर्शवण्यासाठी धारगळ गावासह पेडणे तालुक्यामधील सुमारे ३ हजार ग्रामस्थ पंचायतीसमोर जमा झाले होते व निदर्शने केली होती. त्यानंतर २ डिसेंबरला पंचायतीची बैठक झाली त्यामध्ये सनबर्नला ना हरकत दाखला देण्यासंदर्भात ठराव झाला तो ५ विरुद्ध ४ पंचसदस्यांच्या मतांनी मंजूर झाला आहे. त्यामुळे धारगळमध्ये महोत्सवाचे आयोजन करण्यास परवानगी दिली जाईल, असे सरपंचांनी स्पष्ट केले होते.

परवान्याची प्रत सादर करावी!

परवानगीची प्रत मागूनही ती पंचायत देत नाही. हा निर्णय वरिष्ठ अधिकाऱ्यांकडून आलेल्या दबावाखाली घेण्यात आला आहे. त्यामुळे खंडपीठाने पंचायतीला परवान्याची प्रत सादर करण्याचे निर्देश द्यावेत तसेच २ डिसेंबरला परवाना देण्याचा झालेला निर्णय रद्दबातल ठरवण्यात यावा, अशी विनंती याचिकादाराने केली आहे.