Ferry Boat Service From Divar Island to Panaji One Women Travelled

पणजी: जुने गोवे येथील शवप्रदर्शन सोहळ्यामुळे जुने गोवे ते पणजी मार्गावर वाहनांच्या रांगा लागतात, त्यामुळे दिवाडी ते पणजी या जलमार्गावर फेरीबोटीचा वापर करण्याचा नदी परिवहन खात्याचा प्रयोग पहिल्या दिवशी फारसा यशस्वी झाला नाही. आज खात्याने चार फेरीबोटीही तैनात केल्या, पण दिवसभरात एकाच महिलेने दिवाड ते पणजी असा प्रवास केल्याने हा प्रयोग फसणार असल्याचे स्पष्ट आहे.

दिवाडी ते पणजी हा जलमार्गाचा प्रवास करायचा झाल्यास दीड तासांचा कालावधी लागतो. जुने गोवा येथील शवदर्शन सोहळ्यामुळे दिवाडी ते जुने गोवा या फेरीबोटीद्वारे जायचे झाल्यास पुढे वाहनांची गर्दीचा त्रास लोकांना सहन करावा लागेल, असे काही अधिकाऱ्यांना वाटले. त्यामुळे दिवाडी ते पणजी ही थेट फेरीबोट सेवा सुरू करण्याचा घाट घातला आणि नदी परिवहन खात्याच्या मंत्र्यांनी त्यास मंजुरीही दिली.

पहाटेपासून फेरीबोटी!

मंत्र्यांनी मंजुरी दिल्यानंतर या मार्गावर प्रयोग म्हणून चार फेरीबोटी ठेवून पाहूया असे ठरले, त्यानुसार कालपासून शिरोडा, कुंभारजुवे, दुर्भाट आणि वळवई-मायणा येथील चार फेरीबोटी नदी परिवहन खात्याने आणून या जलमार्गावर तैनात केल्या. परंतु मंगळवारी पहाटेपासून फेरीबोटी तैनात होत्या.

परंतु पणजीला येणाऱ्या फेरीबोटीत सकाळी सात वाजता एकाच महिला प्रवाशाने प्रवेश केला. त्यानंतर एकही फेरीबोट त्या जागेवरून हलली नाही. सायंकाळी कुंभारजुवे येथील नागरिकांनी फेरीबोटीची मागणी केल्यानंतर एक फेरीबोट त्याठिकाणी पाठविण्यात आली.