म्हापसा: नादोडा पंचायत क्षेत्रातील ‘राण्यांचे जुवें’ बेटावर लवकरच नवीन पूल बांधण्यात येणार आहे. या पुलाच्या बांधकामासाठी माती परीक्षणाला एप्रिल २०२५ मध्ये तांत्रिक मंजुरी दिली आहे. लवकरच माती परीक्षणाला प्रारंभ होईल, अशी माहिती थिवीचे आमदार तथा मत्स्योद्योग मंत्री नीळकंठ हळर्णकर यांनी दिली.

विद्यमान पादचारी पुलाच्या डागडुजीचे काम येत्या दोन दिवसांत पूर्ण होईल. त्यानंतर पूल वाहनांसाठी खुला करावा की नाही, यावर लोकांना विश्वासात घेऊन निर्णय घेऊ, असे मंत्री हळर्णकर म्हणाले.

‘राण्यांचे जुवें’ येथील पादचारी पुलाला आज आमदार हळर्णकर यांनी भेट दिली. यावेळी त्यांच्यासोबत सार्वजनिक बांधकाम खात्याचे अभियंते विन्सेंट डिसोझा, संदीप कारखानीस, नादोडाच्या सरपंच विश्वजा हळदणकर, अ‍ॅड. महेश राणे आणि ग्रामस्थ उपस्थित होते.

मंत्री हळर्णकर म्हणाले की, जुवे येथील पादचारी पुलाच्या डागडुजीचे काम अंतिम टप्प्यात पोचले आहे. तसेच याठिकाणी नवीन पुलासाठीचे सर्व शासकीय सोपस्कार पूर्ण करून लवकरच पूल उभारला जाईल. सध्या नवीन पुलासाठी माती परीक्षणाला तांत्रिक मंजुरी दिली आहे. या कामाला १८.४९ लाख रुपये खर्च अपेक्षित आहे.

जुवे येथील पादचारी पूल कमकुवत झाल्याने मागील सहा महिन्यांपासून यावरून वाहनांना जाण्यास निर्बंध घातले आहेत. सध्या या पुलाच्या डागडुजीचे काम सुरू आहे, असे प्रशासनाचे म्हणणे आहे.

माझे काम लोकहितासाठी

जुवे पुलाविषयी सध्या काहीजणांकडून राजकीय आरोप होत आहेत. त्याविषयी विचारले असता मंत्री हळर्णकर म्हणाले, की मी लोकांसाठी काम करतो.

नवीन पूल बांधणीसाठी शासकीय प्रक्रिया सुरू झाली आहे. जे पुलाविषयी आरोप करत आहेत, ती त्यांची बोलण्याची शैली असावी.

अनेकांना निवडणुकीची खुमखुमी

आगामी काळात, जिल्हा परिषद आणि त्यानंतर विधानसभा निवडणुका होणार आहेत. त्यामुळे अनेकजण निवडणुकीसाठी इच्छुक आहेत. तसेच आम्ही कोणाच्या बोलण्यावर निर्बंध लादू शकत नाही. ज्यांना बोलायचे आहे, त्यांनी खुशाल बोलावे. जुवे बेटावर मी अनेक विकासकामांना चालना दिली आहे, असा पुनरुच्चारही मंत्री हळर्णकर यांनी यावेळी केला.