डिचोली: डिचोली-साखळी रस्त्याच्या बाजूने चर खोदताना आवश्यक ती खबरदारी घेण्याच्याबाबतीत निष्काळजीपणा होत असल्याचे आढळून येत आहे. काही ठिकाणी माती रस्त्यावर टाकण्यात येत असल्याने वाहतुकीस अडथळा निर्माण होत आहे. सध्या गोकुळवाडा-सर्वण परिसरात हे प्रकार घडत आहेत. चर खोदला की, दोन-दोन दिवस माती रस्त्यावरच पडलेली दिसून येत असते. (Negligence while digging trenches for cables in Dicholi area)

सध्या वाठादेव येथून (Bicholim) डिचोली-साखळी (Sanqulim) रस्त्याच्या बाजूने दूरसंचार कंपनीकडून केबल टाकण्याचे काम हाती घेण्यात आले आहे. मात्र केबल टाकण्यासाठी खोदण्यात येणारी चरातील माती टाकताना योग्य ती खबरदारी घेण्यात येत नाही. प्रतिबंधात्मक उपाययोजना करण्यात येत नाही, अशी वाहनचालकांची तक्रार आहे. या मातीमुळे रात्रीच्यावेळी अनर्थ घडण्याची शक्यता नाकारता येत नाही. केबलसाठी चर खोदताना संबंधित ठेकेदारांने आवश्यक ती खबरदारी घ्यावी, अशी मागणी वाहनचालकांकडून होत आहे. गोकुळवाडा येथे गोविंदनगर रस्त्याच्या जंक्शनजवळ दोन दिवस माती रस्त्यावरच होती. सोमवारी (ता. २८) ती माती काढण्यात आली.