मडगाव: सावंत मंत्रिमंडळाच्या पहिल्या टप्प्यात गोव्यातील सर्वांत मोठा तालुका असलेल्या सासष्टीला प्रतिनिधित्व न दिल्यामुळे आश्चर्य व्यक्त करण्यात येत आहे. सासष्टी हा तालुका भाजपधार्जिणा नसला तरी या तालुक्यात आठ मतदारसंघ समाविष्ट असल्याने या तालुक्याला मंत्रिमंडळात स्थान मिळणे आवश्यक मानले जाते.

यावेळी या तालुक्यातील नावेली मतदारसंघातून भाजपचे उल्हास तुयेकर हे निवडून आले असून भाजप सरकारला पाठिंबा देणारे अपक्ष उमेदवार आलेक्स रेजिनाल्ड लॉरेन्स हे कुडतरी मतदारसंघातून निवडून आले आहेत. वास्तविक मंत्रिमंडळाच्या पहिल्या टप्प्यात या दोघांपैकी एकाची मंत्रिपदी वर्णी लावण्याची गरज होती, असे मत राजकीय विश्लेषक क्लिओफात कुतिन्हो यांनी व्यक्त केले आहे.

कदाचित दुसऱ्या टप्प्यात संधी

सासष्टी हा लोकसंख्येच्या दृष्टीने सर्वांत मोठा तालुका आहे. मंत्रिमंडळाच्या पुढच्या विस्तारात आणखी तीन मंत्री या मंत्रिमंडळात समाविष्ट केले जाणार असून कदाचित त्यावेळी आलेक्स रेजिनाल्ड लॉरेन्स यांना त्यात समाविष्ट करून घेण्याची शक्यता व्यक्त केली जात आहे.