फोंडा : मडकई येथील श्री नवदुर्गा देवीचा पाचवा प्रकटोत्सव सोमवारी २३ व मंगळवारी २४ असे दोन दिवस मडकईतील पारंपई - तळेखोल येथील श्रीच्या स्थानावर विविध कार्यक्रमांनिशी साजरा करण्यात येणार आहे. मडकई येथील नवदुर्गा प्रकटोत्सव मंडळाच्या व्यवस्थापन समितीतर्फे या उत्सव काळात विविध कार्यक्रमांचे आयोजन केले आहे.

देशातील हा एकमेव प्रकटोत्सव असून गेल्या 9 मे 2018 पासून या उत्सवाला प्रारंभ झाला आहे. 481 वर्षांपूर्वी नवदुर्गा ‘गावशीकान्न' देवी पोर्तुगिजांच्या गोव्यातील धार्मिक छळाच्या काळात ‘देठली‘ नेसलेल्या महिलेच्या रुपात पारंपई - मडकई येथे गुराख्यांसमोर प्रकट झाली होती. त्यामुळेच हे स्थान भाविकांसाठी श्रद्धास्थान ठरले आहे. देवीच्या प्रकट लीलेनंतर श्रीचे भव्य दिव्य मंदिर उभारण्यात आले.

सोमवारी 23 रोजी सकाळी साडेआठ ते दुपारी बारा वाजेपर्यंत प्रकट स्थानावर अभिषेक व विविध धार्मिक विधी होतील. दुपारी साडेबारा वाजता देवी नवदुर्गा प्रकटोत्सवाला मशाल प्रज्वलनाने प्रारंभ होईल.

त्यानंतर दुपारी दीड वाजेपर्यंत लाडेवाडा - मडकई येथील वैरागी आरती मंडळातर्फे महाआरती होतील. दुपारी दीड वाजता तीर्थप्रसाद व महाप्रसाद होईल. दुपारी दोन वाजता पारंपरिक अतिथींचा सन्मान करण्यात येईल. दुपारी तीन ते संध्याकाळी पाच वाजता भोम - अडकोण येथील युवती भजनी मंडळातर्फे भजनाचा कार्यक्रम होईल. त्यानंतर संध्याकाळी साडेपाच ते रात्री साडेआठ वाजेपर्यंत भोम येथील सुदेश नाईक व साथी कलाकारांचा भजनाचा कार्यक्रम होईल. रात्री नऊ ते अकरापर्यंत सुगम संगीताचा कार्यक्रम होणार आहे.

मंगळवारी 24 रोजी सकाळी साडेआठ ते संध्याकाळी पाचपर्यंत प्रकटोत्सव दर्शन सोहळा व सांगणे कार्यक्रम होईल. दुपारी साडेतीन ते पाचपर्यंत दिंडी वारकरी सांप्रदाय फोंडातर्फे हरिपाठ पारायण येईल. संध्याकाळी पाच वाजता प्रकटोत्सव सांगता सोहळा व आभारप्रदर्शनाने या उत्सवाची सांगता होईल.