पणजी: नैसर्गिक शेती हीच शाश्वत शेती असल्याने राज्यात नैसर्गिक शेतीला प्रोत्साहन दिले जाईल. यासाठी 20 सप्टेंबर रोजी एक विशेष उपक्रम होत असल्याची माहिती मुख्यमंत्री डॉ. प्रमोद सावंत यांनी दिली आहे. कृषी विभागाच्या अधिकाऱ्यांसमवेत झालेल्या बैठकीनंतर ते पत्रकारांशी बोलत होते.

(Natural farming activities to start soon in goa says Chief Minister Pramod Sawant)

राज्यातील नैसर्गिक शेतीला प्रोत्साहन देण्यासाठी आणि जमीन वाचवण्यासाठी सद्गुरु जग्गी महाराजांच्या ईशा फाउंडेशनबरोबर नैसर्गिक शेती विकासासाठी विशेष करार झाला आहे. याशिवाय नीती आयोगाद्वारे नैसर्गिक शेतीला पारंपरिक आणि रासायनिक मुक्त कृषिशास्त्र आधारित वैविध्यपूर्ण शेती प्रणाली म्हणून प्रोत्साहन दिले जात आहे. याचाच भाग म्हणून हा उपक्रम राबवला जाणार आहे. यासाठी राज्यातील शेतकऱ्यांना विश्वासात घेऊन एकात्मिक जैवविविधतेसह पिके, झाडे आणि पशुधन यांच्या संवर्धनासाठी हा नैसर्गिक शेतीचा प्रयोग होत आहे, अशी माहिती मुख्यमंत्र्यांनी दिली आहे.