Goa Accident

लहान भावासह दुचाकीवरुन केपेच्या दिशेने जाणाऱ्या दुचाकीचा नाणूस येथे अपघात झाला. या अपघातात दुचाकीचा चक्काचूर झाला असून, केवळ दैव बलवत्तर म्हणून बहीण-भाऊ बचावले आहेत.

अपघातात दुचाकी चालविणाऱ्या महिलेला किरकोळ जखम झाली असून, तिचा भाऊ सुखरुप आहे. नाणूस उसगाव येथे सकाळी ७.३० वाजता हा अपघात झाला.

सुनिती सुहास सावईकर (२३, रा. आंबेली-सत्तरी) असे या अपघातात जखमी झालेल्या महिलेचे नाव आहे. अपघातानंतर उपचारासाठी तिला पिळये (तिस्क-उसगाव) येथील रुग्णालयात दाखल करण्यात आले. त्यानंतर तिला खासगी रुग्णालयात दाखल करण्यात आले.

सुनिती सकाळी भावासह दुचाकीवरुन केपेच्या दिशेने जात असताना तिचा नाणूस उसगाव येथे अपघात झाला. दुचाकीवरील दोघेही खाली फेकले गेले. याचवेळी आलेला ट्रक दुचाकीवरुन गेल्याने दुचाकीचा चक्काचूर झाला. केवळ दैव बलवत्तर म्हणून या अपघातात बहीण - भाऊ दोघेही बचावले आहेत.

कसा झाला अपघात?

दुचाकीची खडीवाहू ट्रकला ओव्हरटेक करण्याच्या नादात विरुद्ध दिशेने आलेल्या एका दुचाकीची धडक स्कुटरला बसल्याने हा अपघात झाला. त्यानंतर ट्रकला दुचाकीची धडक बसल्याने अपघातात स्कुटरचा चुराडा झाला.

मार्गावर सुरु असणारी विविध कामे यामुळे रस्त्यावर खोदकाम करण्यात आले आहे. यामुळे अपघात झाल्याचे सांगितले जात आहे.