Goa Bjp On Cash For Job Scam Accused Shruti Prabhugaonkar

पणजी: पैशांच्या बदल्यात सरकारी नोकऱ्या प्रकरणातील श्रुती प्रभुगावकर हिच्याशी भाजपचा आता कसलाही संबंध नाही, असे पक्षाचे राज्य सरचिटणीस ॲड. नरेंद्र सावईकर यांनी आज पत्रकार परिषदेत स्पष्ट केले. अशा प्रकरणात भाजपचा नेता, पदाधिकारी, कार्यकर्ता जरी असला तरी जनतेने त्याच्याविरोधात पोलिसांत तक्रार द्यावी, असे आवाहन त्यांनी केले. एका कार्यकर्त्यामुळे पक्ष बदनाम होत नाही, अशी पुस्तीही त्यांनी जोडली.

यासाठी त्यांनी गावातील क्लबचे उदाहरण दिले. क्लबचा एक सदस्य वेगळा वागला तर त्याला काढून टाकण्यात येते. तसे पक्षाचे आहे. आताच भाजपची राज्यातील सदस्य संख्या ३ लाख ६२ हजार झाली आहे. ती चार लाखांच्या वर जाईल. त्यापैकी एक कोणी वेगळा वागला म्हणून अख्खा पक्ष बदनाम करणे योग्य नव्हे. तशा व्यक्तीला पक्षातून तत्काळ काढण्यात येते. यापुढेही तसे केले जाईल. श्रुती कधीतरी अशा प्रक्रियेतून पक्षाची सदस्य झाली असेल, तिने पक्षाचे कामही केले असेल; पण सध्या तिच्याशी पक्षाचा संबंध नाही, असे सावईकर म्हणाले.

विरोधी पक्षाने आरोप करणे साहजिक आहे. तसे २०१२ पासून ते आरोपच करत आले आहेत. त्यांनी मात्र आरोप करण्याआधी वस्तुस्थिती तपासून पाहावी. राज्यात कोणीही कोणासोबत छायाचित्र काढतो. इतर राज्यांसारखी येथे परिस्थिती नाही. कोणीही मंत्री, मुख्यमंत्र्यांशी फोनवर बोलतो. त्याचा अर्थ त्या व्यक्तीच्या कृत्यात ते सहभागी असतात, असा होत नाही.

सरकारने पोलिसांना या प्रकरणी तपासाचे पूर्ण स्वातंत्र्य दिले आहे. पारदर्शी प्रकारे तपास सुरू आहे. कर्मचारी भरती आयोग स्थापून अशा दुकानदारीला सरकारनेच टाळे ठोकले आहे. अशा नोकरी फसवणूक प्रकरणात मग तो कोणीही असो, कोणाचाही नातेवाईक असो सुटणार नाही. यापुढेही कोणी आमच्या पक्षाशी संबंधित सापडला तर त्याच्यावरही पक्ष कारवाई करणार, असे सावईकर यांनी सांगितले.

राज्यातील पोलिसांची गुप्तचर यंत्रणा असे प्रकार घडत असल्याची माहिती मिळवण्यात कमी पडली काय, असे विचारल्यावर ते सरकारला विचारा, असे सावईकर यांनी सांगितले. यावेळी त्यांच्यासोबत भाजपचे प्रदेश सचिव सर्वानंद भगत उपस्थित होते.