Ratnagiri-Sindhudurg

सिंधुदुर्ग-रत्नागिरीत नारायण राणे अडीच लाखापेक्षा जास्त मताधिक्याने जिंकतील असा विश्वास गोव्याचे मुख्यमंत्री प्रमोद सावंत यांनी व्यक्त केला. उमेदवारी जाहीर व्हायला वेळ लागला असला तरी याचा परिणाम अजिबात होणार नाही, असेही सावंत यावेळी म्हणाले.

राणेंच्या उमेदवारी अर्ज दाखल करण्यासाठी रत्नागिरीत आयोजित रोड शोमध्ये सावंत यांनी हजेरी लावली.

अनेक वर्षे शिवसेनेकडे असणारी ही जागा अखेर भाजपकडे गेली असून, येथे केंद्रीय मंत्री नारायण राणे यांना उमेदवारी जाहीर करण्यात आली आहे. नारायण राणे आज (शुक्रवार) उमेदवारी अर्ज दाखल करणार असून, यासाठी रत्नागिरीत भव्य प्रचार रॅली काढण्यात आली आहे.

राणेंच्या रॅलीत महाराष्ट्राचे मंत्री दीपक केसरकर, गोव्याचे मुख्यमंत्री प्रमोद सावंत यांच्यासह भाजपचे पदाधिकारी आणि नेते उपस्थित आहेत.

'एनडीएच्या कार्यकत्यांमध्ये उत्साह आहे. खूप वर्षांनी भाजपला ही जागा मिळाली आहे मला खात्री आहे इथे कमळ फुलेल नरेंद्र मोदी यांना तिसऱ्यांदा पंतप्रधान करण्यासाठी संपूर्ण भारतात एक लाट आहे. महाराष्ट्रातील जास्तीत जास्त जागा एनडीएच्या निवडून येतील,' असा विश्वास सावंत यांनी यावेळी व्यक्त केला.

'मोदी, शहा आणि नड्डाजी यांनी कार्यकर्त्यांच्या आग्रहामुळे भाजपला ही जागा दिली आहे. महाराष्ट्रातील 48 पैकी 40 पेक्षा जास्त जागा भाजप जिंकेल. गोव्यातील आम्ही दोन्ही जागा जिंकू. उमेदवारी जाहीर व्हायला वेळ लागला याचा परिणाम अजिबात होणार नाही, नारायण राणे अडीच लाखापेक्षा जास्त मताधिक्याने विनायक राऊत यांचा पराभव करतील,' असा विश्वास सावंत यांनी व्यक्त केला.

तसेच, 'संकल्पपत्र पूर्ण करण्याचा संकल्प भाजपने केला आहे. आम्ही मागील दोन संकल्प 99 टक्के पूर्ण केले आहेत. मोदीजी तिसऱ्या टर्ममध्ये मोठे निर्णय घेतील. तिसरी मोठी अर्थव्यवस्था म्हणून आपला देश पुढे येईल,' असेही सावंत म्हणाले.