नंदुरबार: चोरी, मारामारी यासह विविध गुन्ह्यात महाराष्ट्रासह इतर राज्यात पाहिजे असलेल्या सराईत गुन्हेगाराला गोव्यातून अटक करण्यात आली आहे. नंदुरबार पोलिसांनी संशयिताला गोव्यातील कळंगुट बीचवरुन अटक केली आहे. अनेक दिवसांपासून पोलिसांना चकमा देणारा संशयित गोव्यात असल्याची माहिती खबऱ्याकडून पोलिसांना मिळाली होती.

नागेश उर्फ नाकक्षा दमण्या पाडवी (वय २७, रा. कात्री, ता. धडगाव) असे अटक करण्यात आलेल्या सराईत गुन्हेगाराचे नाव आहे. पाडवी याच्याविरोधात चोरी, मारामारी, मालमत्ता संबधित आठ गुन्हे दाखल आहेत. महाराष्ट्रासह इतर राज्यात देखील त्यांच्याविरोधात गुन्हे दाखल आहेत. अनेक दिवसांपासून महाराष्ट्रासह इतर राज्यातील पोलिस देखील त्याच्या मागावर होते.

मिळालेल्या माहितीनुसार, गुन्हेगार नागेश पाडवी हा गोव्यातील बीचवर असल्याची गुप्त माहिती नंदुरबार पोलिसांनी खबऱ्याने दिली. माहितीच्या आधारे पोलिसांनी विविध पथके तयार करुन गोव्यात पाठवली. पोलिसांनी गोव्यातील विविध बीच पालथे घातले. अखेर कळंगुट बीचवर पोलिसांनी नागेशच्या मुसक्या आवळल्या.

पाडवी याच्याविरोधात नंदुरबार जिल्ह्यात चोरी, मारामारी यासह मालमत्तासंबधित एकूण आठ गुन्हे दाखल आहेत. या शिवाय इतर राज्यात देखील त्याच्याविरोधात गुन्हे नोंद आहेत. पोलिस अनेक दिवसांपासून फरार पाडवीच्या मागावर होते. अखेर गोव्यातून त्याला अटक करण्यात आलीय.