फातोर्डा: मडगाव पालिका क्षेत्रातील गांधी मार्केटमधील दुकाने कवडीमोलाने भाडेपट्टीवर दिल्याने पालिका बैठकीत गदारोळ झाला. भाड्याने दिलेल्या दुकानांचा पुनर्लिलाव करावा, अशी मागणी विरोधी नगरसेवकांनी केली.

मडगाव नागरपालिकेच्या बैठकीत विविध मुद्यांवर चर्चा झाली असली तरी अनेक मुद्यांवर वादंग झाले. काही नगरसेवकांनी नगराध्यक्ष लिंडन परेरा आणि मुख्याधिकारी आग्नेल फर्नांडिस यांना धारेवर धरत या बैठकीच्या इतिवृत्तांताची नोंदणी न केल्याबद्दल नाराजी व्यक्त केली. बैठकीला सर्व नगरसेवक उपस्थित होते.

गांधी मार्केटमध्ये असलेल्या दोन दुकानांचे भाडे 2007 मध्ये 5,800 रुपये होते ते 2022 मध्ये 1,890 रुपये कसे झाले? असा प्रश्न विचारून या दुकान लिलाव प्रक्रियेत मुख्याधिकारी तसेच नगराध्यक्ष गुंतले असल्याचा आरोप नगरसेवक महेश आमोणकर यांनी केला. याविषयी पालिका प्रशासकांकडे तक्रार करणार असल्याचे आमोणकर यांनी सांगितले.

दुकानाच्या लिलावाचा ठराव 14 नगरसेवकांनी संमत केला असला तरी काही नगरसेवकांनी दबावामुळे हात उंचावून या ठरावाला संमती दिली असल्याचा आरोप त्यांनी केला.