Mumbai Goa Highway: गणेशोत्सवानिमित्ताने कोकण प्रवास करणाऱ्यांसाठी खुशखबर आहे. मुंबई गोवा महामार्गावरील कशेडी घाटातील बोगदा आजपासून (दि.11) वाहतुकीसाठी खुला करण्यात आला आहे. सिंधुर्दुगकडे जाणारी एक लेन आज वाहतुकीसाठी खुली केली आहे.

यामुळे नागमोडी कशेडी घाटात (Kashedi Ghat Tunnel) होण्याऱ्या वाहतूककोंडीला ब्रेक लागणार आहे. या एका लेनमधून हलक्या वाहनांना सोडलं जाणार असल्याने, कशेडी घाटातील वाहतूक बऱ्यापैकी सुरळीत होणार आहे. राज्याचे बांधकाम मंत्री रवींद्र चव्हाण यांनी याबाबत माहिती दिली आहे.

'गणेशोत्सवापूर्वी आपल्या मुंबई-गोवा महामार्गाच्या महत्त्वाच्या टप्प्यांचं काम पूर्ण करण्याचं आश्वासन दिलं होतं. त्यानुसार कशेडी बोगद्यातील सिंगल लेनची वाहतूक आता सुरू करण्यात आली आहे. कशेडी ते पोलादपूर हा प्रवास अवघ्या 10 मिनिटात पार करता येईल आणि प्रवाशांचा बराच वेळ वाचेल.'

'यंदा कोकणात जाणाऱ्या गणेशभक्तांनाही निश्चितच हा बोगदा सुरू झाल्यामुळे फायदा होईल. उर्वरित कामदेखील लवकरच पूर्ण करून संपूर्ण मुंबई - गोवा महामार्ग प्रवाशांसाठी उपलब्ध होईल, असं आश्वासन देतो.' असे ट्विट मंत्री चव्हाण यांनी केले आहे.

कोकण म्हटलं की सर्वांनाच वळणावळणाचे नागमोडी रस्ते आठवतात, पण हे रस्ते वाहतुकीत अडथळे निर्माण करतात. त्यामुळे सरळ रस्ता उभारण्याच्या दृष्टिकोनातून पोलादपूरमधील भोगाव ते रत्नागिरीतील कशेडी पर्यंत टनेल उभारण्यात आले आहे.

या टनेलमुळे पूर्वी जे अंतर गाठायला 1 तास लागायचा, तेच अंतर आता अवघ्या 10 मिनिटांत गाठता येणार आहे. यामुळे प्रवाशांची 45 मिनिटे वाचतील.