Mulgao Mineral Transport Inspection

डिचोली: सध्या बंद असलेल्या मुळगावमधील खाणीची उद्या (शुक्रवारी) संयुक्त पाहणी होणार आहे. उद्या दुपारी ३ वाजता ही पाहणी करण्याचे निश्चित करण्यात आले आहे. ‘वेदांता’चे अधिकारी तसेच पंचायत मंडळासह मुळगावमधील विविध ग्रामसंस्थांच्या प्रतिनिधींसोबत ही पाहणी होणार आहे.

खाण आणि भूगर्भ खात्यासह अन्य सरकारी खात्यांचे अधिकारी या पाहणीवेळी उपस्थित राहणार आहेत. तशी नोटीस डिचोलीचे उपजिल्हाधिकारी भिमनाथ खोर्जुवेकर यांनी संबंधितांना जारी केली आहे. मुळगावमधील खनिजप्रश्नी गेल्या सोमवारी डिचोलीच्या उपजिल्हाधिकारी कार्यालयात एक महत्त्वाची बैठक झाली होती.

नवनियुक्त उपजिल्हाधिकारी बी. खोर्जुवेकर यांच्या मार्गदर्शनाखाली झालेल्या त्या बैठकीत खनिजसंदर्भात चर्चा झाली. मुळगावच्या प्रतिनिधींनी आपले म्हणणे अधिकाऱ्यांसमोर मांडले होते. खाणीची संयुक्त पाहणी करण्याचा निर्णय त्या बैठकीत झाला होता.

मुळगावची खाण बंद

खनिज व्यवसायाला आमचा विरोध नाही, अगोदर गावचे प्रश्न जाग्यावर घाला. नंतरच खाणीचा विचार करा, अशी मुळगावच्या लोकांची मागणी आहे. मुळगावमधील मंदिरांसह घरेदारे, शेती-बागायती, तळी आणि अन्य नैसर्गिक जलसंपदा खाण लीज क्षेत्रातून बाहेर काढा. नैसर्गिक वैभव जपताना गावचे अस्तित्व सांभाळा. शेतकऱ्यांचे प्रलंबित प्रश्न सोडवा. रोजगारात स्थानिकांना प्राधान्य द्या आदी मुळगाववासीयांच्या प्रमुख मागण्या आहेत.