Verna IDC: गोवा औद्योगिक विकास महामंडळ (आयडीसी)च्या वतीने शुक्रवारी (ता.१९) पहिली तिमाही आढावा बैठक झाली. भारतीय उद्योग महासंघ (सीआयआय), भारतीय वाणिज्य आणि उद्योग चेंबर महासंघ (फिक्की), असोचॅम (असोसिएटेड चेंबर्स ऑफ कॉमर्स अँड इंडस्ट्री ऑफ इंडिया) आणि लघु उद्योग भारती यांच्यासह उद्योग संघटनेचे प्रतिनिधी यांच्यासमवेत चार बैठका आयोजित केल्या जात आहेत.

गोवा आयडीसीच्या संचालक मंडळावर प्रतिनिधित्व नसलेल्या औद्योगिक संस्थांकडूनही औद्योगिक वसाहतीमधील सेवासुविधा तसेच उद्योग विकासासाठीच्या त्यांच्या अपेक्षा, अनुभव, मते प्राप्त करण्याच्या उद्देशाने या बैठकांचे आयोजन केले जात आहे.

या सल्लाबैठकांमध्ये गोवा आयडीसीच्या वतीने राबवण्यात येत असलेले धोरण, योजना, उपक्रम तसेच पाठपुरावा करण्यात येत असलेल्या समस्या, प्रश्न याबाबतचा सविस्तर अहवालही उद्योग संस्थांसमोर मांडला जात आहे. या अहवालाबाबत योग्य दिशा, अंमलबजावणी करण्याबाबत उद्योग संस्थांकडून प्राप्त सूचना, शिफारशीही गोवा आयडीसीच्या मंडळासमोर सादर केल्या जाणार आहेत.

तिमाही सल्लाबैठकांचे आयोजन करण्यामागे गोवा आयडीसीच्या मंडळावर प्रतिनिधित्व नसलेल्या उद्योग संस्थांकडूनही उद्योग विकास व साधनसुविधांबाबत अनुभव, अपेक्षा व मते समजून घेण्याचा उद्देश आहे. राज्यामध्ये अनुकूल, उत्साहवर्धक व्यवसाय वातावरण निर्मिती करण्याच्या कामी सर्वच उद्योग संस्थांसमवेत सक्रिय सहकार्य, सहभाग मिळवण्याचा आमचा उद्देश आहे.

- प्रविमल अभिषेक, व्यवस्थापकीय संचालक, गोवा आयडीसी