सासष्टी: आज शेतकऱ्यांचे प्रश्‍‍न आणि समस्या अधांतरी आहेत. त्‍या सोडविण्याचा कोणीच प्रयत्न करत नाही. मात्र गोव्यातील शेतकऱ्यांच्या समस्या सोडविण्‍यासाठी आता मी पुढाकार घेणार असून, त्‍या केंद्रीय कृषीमंत्री शिवराज सिंग चौहान यांच्‍यासमोर ठेवणार आहे. पंतप्रधान नरेंद्र मोदी यांनाही याबाबत निवेदन देणार आहे. शिवाय लोकसभेत आवाज उठवणार आहे, असे दक्षिण गोव्याचे खासदार कॅप्टन विरियातो फर्नांडिस यांनी सांगितले.

मडगाव कोकण रेल्वेस्‍थानकासमोर असलेल्‍या शेतजमिनींच्‍या मालकांशी अर्थात शेतकऱ्यांशी चर्चा केल्यानंतर फर्नांडिस पत्रकारांशी बोलत होते. शेतकरी क्लावडियस डायस यांनी खासदारांना एक निवेदन सादर केले. त्यात शेतजमीन परत शेतकऱ्यांच्या ताब्यात देण्याची त्यात मागणी करण्यात आली आहे. यावेळी सावियो कुतिन्हो व शेतकऱ्यांची उपस्‍थिती होती.

कृषीउत्पादनाच्या वाढीसाठी जास्तीत जास्त शेतजमीन लागवडीखाली आणणे गरजेचे आहे. मात्र येथे उलटी प्रक्रिया होत आहे. गोव्यातील शेतजमिनी मेगा प्रकल्पांसाठी संपादन केल्या जात आहेत. मुख्यमंत्री ‘स्वयंपूर्ण गोवा’ तर पंतप्रधान ‘आत्मनिर्भर भारत’ याबाबतच्या गोष्टी करतात. मात्र शेतकऱ्यांकडे दुर्लक्ष करतात, असा आरोपही खासदार फर्नांडिस यांनी केला.

कृषीउत्पादन वाढविण्यासाठी सरकारच्या अनेक योजना आहेत. त्यांची माहिती शेतकऱ्यांपर्यंत पोहोचणे आवश्यक आहे. जिल्हा ग्रामीण विकास मंडळाच्या अध्यक्षपदी असल्‍याने सरकारी योजना शेतकऱ्यांपर्यंत पोहोचविण्याचा मी प्रयत्न करणार आहे, असे खासदार फर्नांडिस यांनी सांगितले.

शेतकऱ्यांना शेती करण्‍यास सरकारकडूनच आडकाठी!

मडगावचे आमदार दिगंबर कामत यांच्यावरही खासदार विरियातो फर्नांडिस यांनी टीका केली. ते म्‍हणाले की, २००४ साली मडगाव कोकण रेल्वेस्‍थानकासमोरील जागा बसस्थानकासाठी संपादित केली होती. नंतर २००९ साली परप्रांतीयांचे पुनर्वसन करण्यासाठी शेतकऱ्यांना नोटिसा पाठविण्यात आल्‍या. त्‍यानंतर या जागेत कचरा टाकण्याचा प्रयत्न झाला. आता ही जागा सरकारच्या ताब्यात असून शेतकऱ्यांना शेती करण्‍यासाठीही सरकारच्या दबावाला सामोरे जावे लागते. ही शेतजमीन परत शेतकऱ्यांच्या नावावर करून त्‍यांच्‍या ताब्यात द्यावी, अशी मागणी त्‍यांनी केली.