कुडचडे येथील पालिका बाजार प्रकल्पाचे काम गेली दोन वर्षे रखडले असून अर्धवट बांधकाम झालेल्या या प्रकल्पात सध्या पावसाचे पाणी मोठ्या प्रमाणात साचल्याने डासांची पैदास होऊन रोगराई पसरणार असल्याचे नगरसेवक बाळकृष्ण होडारकर यांनी कुडचडे येथे घेतलेल्या पत्रकार परिषदेत सांगितले.

पालिका बाजाराची जुनी इमारत पाडून त्या ठिकाणी नवीन इमारत बांधण्याचे काम गेल्या दोन वर्षांपासून सुरू आहे. याठिकाणी व्यवसाय करणाऱ्या व्यावसायिकांचे दुसऱ्या ठिकाणी स्थलांतर केले, असे होडारकर यांनी सांगितले.

हा प्रकल्प वेळेत पूर्ण न करणे तसेच सुरक्षेसाठी कोणतीच उपाययोजना आखली गेली नसल्याने येथे मोठ्या प्रमाणात पाणी तुंबले आहे. त्यामुळे बांधकाम करणाऱ्या कंत्राटदारावर कठोर कारवाई करावी, अशी होडारकर यांनी केली.

या प्रकल्पात पूर्वीच्या व्यावसायिकांना त्यांची दुकाने परत लवकर मिळवून दिल्यास त्यांना मोठा दिलासा मिळणार आहे, असे होडारकर यांनी सांगितले.