Morjim No Parking Zone Violations

मोरजी: उत्तर गोवा जिल्हाधिकाऱ्यांनी मोरजीतील न्यू वाडा येथील मुख्य रस्त्याच्या बाजूला नो पार्किंग झोन जाहीर केला. त्यानुसार पंचायतीने त्या ठिकाणी नो पार्किंग फलक लावले आहेत. तरीही या ठिकाणी मोठ्या प्रमाणात वाहने पार्क केली जातात. या विरोधात वाहतूक पोलिसांनी धडक कारवाई करावी, अशी मागणी नागरिक करत आहेत.

या रस्त्याच्या बाजूला हॉटेल्स, रिसॉर्ट व अन्य दुकाने आहेत. मात्र येथे येणाऱ्या ग्राहकांसाठी पार्किंगची सोय नाही, त्यामुळे वाहने रस्त्याच्या दोन्ही बाजूनी पार्क केली जातात. जरी हा रस्ता नो पार्किंग झोन जाहीर केला असला तरी या आदेशाला कुणी जुमानत नाहीत. त्यामुळे रस्त्यावरील वाहतुकीला अडसर निर्माण होतो. याचा प्रचंड मनस्ताप स्थानिकांना सहन करावा लागतो.

पार्किंग प्रकल्प आवश्‍यक

येथील व्यावसायिकांनी आपल्या ग्राहकांसाठी पार्किंगची सोय केली नसल्याने या समस्येत अधिक भर पडली आहे. यावर तोडगा काढणे आता आवश्‍यक झाले आहे. रस्त्यावरील पार्किंग थांबवायचे असेल तर दुसरा पर्याय देणे आवश्‍यक आहे. त्यासाठी पंचायत व येथील व्यावसायिकांनी पुढाकार घेणे आवश्‍यक आहे. येथे येणाऱ्या वाहनांसाठी स्वतंत्र पार्किंग प्रकल्प उभारावा, अशी मागणी होत आहे.