पणजी: गेल्‍या काही वर्षांत देशभरात जी बारा ग्रीनफिल्‍ड विमानतळे कार्यान्‍वित झाली, त्‍यातील मोपा येथील मनोहर आंतरराष्‍ट्रीय विमानतळावर येजा करणाऱ्या विमानांची संख्‍या अधिक आहे. या विमानतळावर प्रत्‍येक आठवड्याला ७१४ विमानांची येजा होत असल्‍याची माहिती केंद्रीय नागरी विमानोड्डाण राज्‍यमंत्री मुरलीधर मोहोळ यांनी राज्‍यसभेतील लेखी प्रश्‍नाच्‍या उत्तरातून दिली आहे.

मोपा येथील मनोहर आंतरराष्‍ट्रीय विमानतळासह दुर्गापूर, शिर्डी, पक्‍योंग, कन्‍नूर, कलबुर्गी, ओर्वाकल, चिपी-सिंधुदुर्ग, खुशीनगर, इटानगर, शिवमोगा आणि राजकोट येथील ग्रीनफिल्‍ड विमानतळे गेल्‍या काही वर्षांत सुरू झाली.

या बाराही विमानतळांपैकी मोपा विमानतळावर येजा करणाऱ्या विमानांची संख्‍या सर्वाधिक आहे. या विमानतळावर प्रत्‍येक आठवड्याला ७१४ विमाने येजा करतात, असे मंत्री मोहोळ यांनी नमूद केले आहे. दरम्‍यान, गेल्‍या तीन वर्षांत या विमानतळांनी दहा कोटी प्रवाशी हाताळले असल्‍याचेही मोहोळ यांनी स्‍पष्‍ट केले आहे.

कोणत्‍या विमानतळावर किती विमानांची ये-जा (आठवड्याला)

मोपा ७१४

दुर्गापूर ७६

शिर्डी ८४

पक्‍योंग -

कन्‍नूर २७०

कलबुर्गी १४

ओर्वाकल १८

सिंधुदुर्ग १५

खुशीनगर -

इटानगर ३६

शिवमोगा ४०

राजकोट १३०