गोव्यात रस्ते अपघाताबरोबरच कचऱ्याची समस्या सर्वसामान्यांची डोकेदुखी ठरत आहे. पणजी, मडगाव, म्हापसा ठिकाणच्या वाढत्या शहरीकरणाबरोबरच कचरा समस्या देखील वाढत चालली आहे. म्हापसा- मोयारा पुलाजवळ देखील दिवसेंदिवस कचऱ्याचे वाढते ढीग पाहायला मिळत असून या समस्येवर उपाय म्हणून ग्रामपंचायतीने घटनास्थळी सीसीटीव्ही कॅमेरे बसवण्याचा निर्णय घेतला आहे. या प्रकारामुळे उघड्यावर कचरा फेकणाऱ्यांवर काही प्रमाणात चाप बसेल

गावात प्रवेश करताना पुलाच्या कडेला टाकण्यात आलेल्या कचऱ्यामुळे सर्वत्र गलिच्छपणा वाढत असून नागरिकांच्या आरोग्याचाही प्रश्न निर्माण होऊ लागला आहे. तसेच परिसरात दुर्गंधी पसरत असून गावाची प्रतिमा मालिन होत आहे. त्यामुळे मोइरा पुलाजवळ कचरा टाकण्यापासून परावृत्त करण्यासाठी मोयरा ग्रामपंचायतीने घटनास्थळावर लक्ष ठेवण्यासाठी सीसीटीव्ही कॅमेरे बसवण्याचा निर्णय घेतला आहे.

अनेकवेळा येथील स्थानिकांनी हा रस्ता साफ करण्यासाठी मोहीम हाती घेतली होती आणि पंचायतीने देखील या कामी हातभार लावून कचरा उचलला होता.

सदरचा परिसर बस्तोडा ग्रामपंचायतीच्या देखील अखत्यारीत येत असल्याने मोइरा पंचायतीने त्यांना पत्र लिहून या प्रकरणी आळा घालण्यासाठी सीसीटीव्ही कॅमेरा बसवण्यास सांगितले होते.

मात्र बस्तोडा ग्रामपंचायतीकडून कोणताही प्रतिसाद न मिळाल्याने मोइरा पंचायतीने हा परिसर सीसीटीव्हीच्या निगराणीखाली ठेवण्याचा निर्णय घेतला.