Kudchade News :

डिचोली, जन्मत:च पायाने अधू आणि कायम जमिनीला खिळलेल्या कुडचिरेतील १२ वर्षीय बालकाला आता कृत्रिम पायांचा आधार मिळाला आहे.

कुडचिरे येथील पांडुरंग गावकर याला समाज कल्याण खात्याच्या योजनेतून कृत्रिम पाय बसविले आहेत. आमदार प्रेमेंद्र शेट यांच्या प्रयत्नांमुळे या बालकाच्या जीवनात नवी पालवी फुटली आहे.

आमदार प्रेमेंद्र शेट यांनी मंगळवारी (ता. २६) या बालकाच्या घरी भेट देऊन त्याची विचारपूस केली. यावेळी कुडचिरेच्या सरपंच प्रियंवदा गावकर तसेच पांडुरंगचे आई-वडील उपस्थित होते.

कृत्रिम पाय प्रत्यक्ष कसे काम करतात आणि पांडुरंग या कृत्रिम पायांवर उभा राहून कसा चालू शकतो, त्याची आमदार शेट यांनी प्रत्यक्ष पाहणी केली.

आमदार प्रेमेंद्र शेट यांच्या प्रती पांडुरंगचे वडील सागर गावकर यांनी कृतज्ञता व्यक्त केली.

आई-वडिलांच्या खांद्यावरून तो जायचा शाळेत

पांडुरंगचे दोन्ही पाय जन्मत:च वाकडे होते. त्यामुळे कृत्रिम पाय बसवेपर्यंत पांडुरंग उभा राहिलाच नाही. आईवडील त्याला खांद्यावर घेऊन शाळेत नेत असत. मध्यंतरी आई-वडिलांनी पांडुरंग उभा राहावा म्हणून खूप प्रयत्न केले.

डॉक्टरांनी शस्त्रक्रिया करून त्याचे वाकडे झालेले पाय काढले. बिगर सरकारी संस्थांनीही मदत केली. मात्र, त्याचा काहीच उपयोग झाला नाही. अखेर आमदार शेट यांनी या बालकाला कृत्रिम पाय मिळवून दिले.