Pernem News : मोरजी, पेडणे मतदारसंघातील रस्त्यांची स्थिती भयानक आहे. ठिकठिकाणी रस्त्यावर पडलेले खड्डे आणि त्यातून होणारे अपघात हे स्थानिक आमदार प्रवीण आर्लेकर यांना दिसत नाही का? असा सवाल काँग्रेसचे नेते ॲड. जितेंद्र गावकर यांनी करून आमदार प्रवीण आर्लेकर हे अकार्यक्षम असून त्यांनी त्वरित राजीनामा द्यावा, अशी मागणी केली.

कासारवर्णे पूर्वा जंक्शनवर मागच्या कित्येक महिन्यांपासून एक भला मोठा खड्डा पडला होता. तो खड्डा बुजवण्यास सार्वजनिक बांधकाम खाते रस्ता विभाग अपयशी ठरले.

शिवाय याच रस्त्यावरून स्थानिक आमदार प्रवीण आर्लेकर हे वारंवार कोणत्या ना कोणत्या कामाच्या निमित्ताने येत-जात असतात; परंतु त्यांना हा खड्डा आजपर्यंत दिसला नाही. त्याच्या निषेधार्थ पेडणे काँग्रेसतर्फे गुरुवारी (ता.९) हा खड्डा बुजवण्यात आला.

त्यावेळी ॲड. जितेंद्र गावकर बोलत होते. यावेळी पेडणे गट काँग्रेस अध्यक्ष कृष्णा नाईक, सामाजिक कार्यकर्ते उदय महाले, भास्कर नारुलकर आदी उपस्थित होते.

ही मोठी शोकांतिका

सामाजिक कार्यकर्ते भास्कर नारुलकर यांनी सांगितले की, स्थानिक आमदाराला विकास करण्यासाठी कदाचित वेळ मिळत नसेल. त्यामुळेच असे रस्त्यांना खड्डे पडलेले आहेत.

आमदारांच्या नाकर्तेपणामुळे नागरिकांना रस्त्यावर येऊन खड्डे बुजवावे लागतात, ही शोकांतिका आहे. त्यामुळे लोकांनी आता आमदारांना जाब विचारणे गरजेचे आहे. आमदार म्हणून त्यांनी लक्ष देणे गरजेचे आहे.