कुठ्ठाळीचे आमदार आंतोन वाझ यांनी किरापावलो-केसरव्हाळ येथील परिसरात एकूण ५६ पथदीप व कनेक्टर बसवून विजेची सोय केली आहे. नुकतेच या पथदीपांचे आमदार आंतोन वाझ यांच्या हस्ते रितसर नारळ वाढवून उद्‌घाटन करण्यात आले. यासाठी एकूण ६ लाख रुपये खर्च आला. यावेळी वास्को येथील वीज खात्याचे साहाय्यक अभियंता विक्रम कारेकर यांनी पुष्पगुच्छ देऊन त्यांचे स्वागत केले.

यावेळी आमदार आंतोन वाझ म्हणाले की, आपण आपल्या परीने शक्य ती विकासकामे करण्याचा प्रयत्न करीत असून त्याचा जनतेला फायदा झाला पाहिजे, तेव्हा आपण वीज खात्याच्या अभियंत्यांचे सहकार्यासाठी मनापासून आभार मानतो. यावेळी आमदार आंतोन वाझ यांचे स्वीय सचिव एडी फर्नांडिस, कुठ्ठाळी वीज खात्याचे कर्मचारी उपस्थित होते.