पणजी: मिरामार किनाऱ्यावर व्यवसायाच्या जागेवरून गुरुवारी मध्यरात्री दोन गटांत तुफान हाणामारी झाल्याची घटना घडली. याप्रकरणी पणजी पोलिसांनी दोन्ही गटांतील आठ जणांविरुद्ध सार्वजनिक शांततेचा भंग केल्याप्रकरणी गुन्हा नोंदवला आहे.

मिळालेल्या माहितीनुसार, २५ सप्टेंबर रोजी रात्री ११.३० ते १२.३०च्या सुमारास मिरामार किनाऱ्यावर व्यवसायाच्या जागेवरून दोन गटांत वाद झाला. या वादाचे रूपांतर हाणामारीत झाले. दोन्ही गटांतील व्यक्तींनी एकमेकांवर चाव्या तसेच घरातील भांड्यांनी हल्ला केल्याचे पोलिसांनी सांगितले.

पहिल्या गटात ढवळी-ताळगाव व केवणे-ताळगाव येथील पुष्पांजली नारझारी, हलिमा काद्रोळी, आयेशा काद्रोळी आणि मलिक काद्रोळी यांचा समावेश आहे. दुसऱ्या गटात लूर्ड्स वाडो, ताळगाव येथील नासीर शेख, मोईनुद्दीन शेख, मुन्नी बी शेख आणि जावेद शेख यांचा समावेश आहे.

संशयितांना नोटीस बजावण्यात आली असून, पुढील तपास उपनिरीक्षक महेश नाईक करीत आहेत.