पणजी : भाजपमधून बंड करुन काँग्रेसवासी झालेले कळंगुटचे आमदार मायकल लोबो हे अमित शाहांसोबतच्या फोनमुळे चांगलेच चर्चेत होते. गेले काही दिवस ते माध्यमांपासून दूर होते. मात्र अखेर आज काँग्रेसने घेतलेल्या पत्रकार परिषदेत अमित शाहांसोबतची ती चर्चा म्हणजे केवळ अफवा असल्याचा दावा मायकल लोबोंनी केला आहे. गोव्यात सोशल मीडियावरुन अफवांना ऊत आला असून आमदार होण्याआधीच अफवा सुरु असल्याचा आरोप मायकल लोबोंनी केला आहे. काँग्रेसचे आमदार काहीही झालं तरी फुटणार नाहीत, असा विश्वासही त्यांनी व्यक्त केला आहे. (Michael Lobo News Updates)

येत्या 10 मार्चला 3 वाजेपर्यंत निकाल हाती येणार अशी अपेक्षा आहे. त्यानंतर संध्याकाळी 5 वाजता काँग्रेसचे (Congress) आमदार आपला नेता निवडून सत्तास्थापनेचा दावा करणार असल्याचंही लोबोंनी स्पष्ट केलं आहे. विरोधीपक्षात बसणाऱ्यांनी म्हणजेच भाजपने आमची चिंता करु नये. आमच्या संपर्कात सर्वच पक्षांचे नेते आहेत, मात्र त्यांना भाजपचं (BJP) सरकार येऊ द्यायचं नाही. त्यामुळे भाजपचं धाबं दणाणलं असून आता सर्व पक्षांना संपवण्याचा प्रयत्न करणाऱ्या भाजपमध्ये चिंतेचं वातावरण आहे असा टोलाही लोबोंनी लगावला आहे.

भाजपला लाथ मारुन मगोपने आघाडीतून बाहेर पाडलं. मला ढवळीकर बंधूंचा आदर आहे. भाजपकडून ढवळीकर बंधूंना धमक्या दिल्या जात आहेत. मात्र कोणत्याही परिस्थितीत ढवळीकर बंधू पुन्हा भाजपसोबत जाणार नाहीत. मगोपचे आमदार चोरुन नेण्याचा भाजपचा प्रयत्न आहे, असा आरोप मायकल लोबोंनी केला आहे.

गोव्याला पुन्हा एकदा मुक्ती मिळणार आहे. त्यामुळे गोवेकरांनी आनंदी राहावं. त्यांना हवं तेच आता गोव्यात होणार, असा विश्वासही लोबोंनी व्यक्त केला. अमित शाहाचा कॉल आला हे छापून आणणाऱ्यांनाच विचारा. मायकल लोबो फुटणाऱ्यांपैकी नाही. फोडाफोडीचं राजकारण करणारे आता पक्षात नाहीत, असा बोचरा वारही त्यांनी केला आहे.

दरम्यान लोबोंनी (Michael Lobo) शेतकऱ्यांच्या प्रश्नावरुन गोव्यातील भाजप सरकारवर निशाणा साधला आहे. लिंक रोडसाठी शेतकऱ्यांच्या जमिनी लाटल्याचा आरोप त्यांनी सरकारवर केला आहे. उड्डाणपुलं बांधून जमिनी वाचवता आल्या असत्या मात्र सरकारने लोकांच्या शेतजमिनींवर रस्ते बांधण्याचा चंग बांधल्याचा आरोप लोबोंनी केला आहे. तसंच यावेळी ईडी आणा किंवा आयकर आणा आमदार घाबरणार नाहीत, ते काँग्रेससोबत राहणार, असा विश्वासही त्यांनी व्यक्त केला आहे.