साखळी: सध्या गोव्यात गोमंतकीय आपल्याच घळात सुरक्षित नसून मुख्यमंत्री राज्यभर ‘माझे घर’ योजनेच्या प्रचारासाठी फिरत आहेत. ‘माझे घर’ हा एक निवडणूक स्टंट असून अनेक योजनांप्रमाणेच लोकांची फसवणूक करण्याचे एक षडयंत्र आहे.

देशभरात सुरू असलेल्या ‘व्होटचोरी’वर जागृती करून निवडणूक आयोगाला निवेदन पाठविण्यासाठी सह्यांची मोहीम पक्षाने हाती घेतली आहे. त्याला उत्स्फूर्त प्रतिसाद लाभत आहे, असेही काँग्रेस प्रदेशाध्यक्ष अमित पाटकर यांनी साखळी येथे सांगितले.

साखळीत आयोजित सह्यांच्या मोहिमेत पाटकर यांच्यासह उत्तर गोवा अध्यक्ष विरेंद्र शिरोडकर, साखळी गटाध्यक्ष राजेश सावळ, महिला अध्यक्ष गौरी गावस, अल्पसंख्याक अध्यक्ष झरीन शेख, महिला नेत्या रेणूका देसाई, माजी नगरसेवक राजेंद्र आमेशकर व इतरांची उपस्थिती होती.उपस्थितांनी यावेळी साखळी बसस्थानक परिसर, बाजारात फिरून लोकांमध्ये जागृती केली व सह्या घेतल्या.

‘माझे घर’विरोधींना जवळ करू नका!

सर्वसामान्य गोवेकरांना दिलासा देण्यासाठी आखण्यात आलेल्या ‘माझे घर’ योजनेला विरोध करणाऱ्या लोकांना जवळ करू नका, असे आवाहन मुख्यमंत्री डॉ. प्रमोद सावंत यांनी केले. ही सरकारची महत्त्वाकांक्षी योजना असून राज्यातील सर्वसामान्य जनतेचे हित लक्षात घेऊन या योजनेची अंमलबजावणी होणार आहे, असेही ते म्हणाले.