Raksha Bandhan 2023 : पणजी, ज्येष्ठ कार्यकर्ते राजीव जोशी यांच्या घरी आज ‘भाईदूज’ अर्थात ‘भाऊबीज’ साजरी केली. राजीव जोशी यांची मुलगी रिद्धी जोशी हिने हा विधी पार पाडला, त्यामुळे मला त्यांच्या कुटुंबाचा अविभाज्य भाग असल्याचे वाटले.

त्याच्या कुटुंबाचा चांगुलपणा, सर्वसमावेशकता यामुळे आजची भाऊबीज खास आणि संस्मरणीय बनली,असे उद्‍गार गोव्याचे आरोग्यमंत्री विश्‍वजित राणे यांनी काढले.

राज्यात भाऊ-बहिणींचे अतूट नाते वृद्धिंगत करणारा भाऊबीज सण साजरा होत असताना आरोग्य मंत्री विश्‍वजित राणे मध्य प्रदेशच्या निवडणूक प्रचारात व्यग्र आहेत. भाऊबीज सणाचे औचित्य साधून मंत्री राणे यांनी आज मध्य प्रदेशमधील इंदूर येथील जोशी कुटुंबीयांसमवेत भाऊबीज साजरी केली.

मंत्री राणे पुढे म्हणाले,की मध्यप्रदेशातील आगामी निवडणुकीसाठीचा प्रचार संपत आला असताना, मी इंदूरमधील सर्व उमेदवारांना, पक्षाच्या पदाधिकाऱ्यांना आणि कार्यकर्त्यांना शुभेच्छा देऊ इच्छितो. मध्य प्रदेश हे पूर्वी अनेक विचारवंतांचे जन्मस्थान राहिले आहे.

जोशी यांचे अनुभव, अंतर्दृष्टी प्रचारादरम्यान अनेक प्रसंगी निर्णायक ठरली. जोशी यांच्या कुटुंबातील सदस्यांना भेटणे, संवाद साधणे अगदीच कौटुंबिक वाटले,असेही राणे म्हणाले.

मुख्यमंत्र्यांची भाऊबीज

मुख्यमंत्री डॉ. प्रमोद सावंत यांनी आज आपल्या बहिणीच्या घरी जाऊन भाऊबीज हा सण साजरा केला. त्यांच्या बहिणीने दीर्घायुष्य, सुख- समाधान, ऐश्वर्य लाभावे, अशी इच्छा व्यक्त करून औक्षण केले.