Panaji Land Use Planning : उत्तर गोवा नियोजन व विकास प्राधिकरणाने (एनजीपीडीए) जाहीर केलेल्या ताळगाव भूवापर आराखडा व भूवापर नोंदणी मसुद्यामध्ये अनेक त्रुटी आहेत. हा आराखडा व नोंदणी कायद्याचे उल्लंघन करून केला आहे. त्यामुळे हरकती व सूचना ताळगाववासीयांकडून मागवण्याऐवजी तो रद्द करून स्थानिक नागरिक, ताळगाव पंचायत तसेच संबंधित सरकारी खात्यांना विश्‍वासात घेऊन तो नव्याने तयार करण्याची मागणी ताळगाव जागृत नागरिकांनी केली आहे.

प्राधिकरणाने ताळगाव भूवापर आराखडा व भूवापर नोंदणी याबाबत लोकांकडून हरकती व सूचना मागितल्या आहेत, त्याला आमचा विरोध आहे. हा आराखडा व नोंदणी सध्या अस्तित्वात असलेल्या माहितीच्या आधारे तयार करण्याची कायद्यात तरतूद असताना एका दशकापूर्वीच्या माहितीवर तो तयार केला आहे. त्यामुळे तो रद्द करावा. जी माहिती या आराखड्यात नाही त्याचा समावेश करून तो तयार करावा व त्यानंतरच त्यावर हरकती व सूचना मागवण्यासाठी लोकांसाठी खुला ठेवला जावा अशी मागणी, सिसिल रॉड्रिग्ज यांनी केली.

आक्षेप काय?

• आराखड्यासंदर्भात प्राधिकरणाच्या अधिकाऱ्यांकडून मागितलेले स्पष्टीकरण संशयास्पद असून यात गैरव्यवहाराची शंका आहे. आराखड्यात ताळगावातील डोंगर, काही रस्त्यांचा उल्लेख नाही.

• सर्वे खात्याने प्राधिकरणाला ताळगावातील सध्याची माहिती दिली नसल्याने तो २०१० सालच्या माहितीच्या आधारे तयार करण्यात आलेला आहे.

• हा आराखडा व नोंदणी प्राधिकरणाच्या कर्मचाऱ्यांनी ठिकठिकाणी जाऊन जमा केलेल्या माहितीच्या आधारे तसेच ड्रोनच्या वापर करून केली असल्याचे अधिकाऱ्यांकडून सांगण्यात येत असले तरी त्यात खोटारडेपणा आहे.

• त्यांनी केलेल्या या सर्वेबाबात स्पष्टीकरण देऊ शकत नाहीय त्यामुळे हा आराखडा सत्य माहिती दडपून तयार केल्याचा आरोप ॲड. भूपेंद्र यांनी केला.