मडगाव : दक्षिण गोवा जिल्हा रुग्णालयाजवळ औषधांची दुकानं नसल्याने रुग्णांची गैरसोय होत असल्याचं चित्र आहे. मडगावसारख्या मोठ्या शहरात अशाप्रकारची समस्या उद्भवत असल्याने आश्चर्य व्यक्त केलं जात आहे. मडगावमधील जिल्हा रुग्णालयाशेजारी औषध दुकानांची कमतरता असून रुग्णालयाच्या फार्मसीमध्येही औषधांची उपलब्धता नसल्याने रुग्णांचे नातेवाईक त्रस्त झाले आहेत. (South Goa District Hospital News Updates)

गेल्या काही महिन्यांपासून जिल्हा रुग्णालयात औषधांची कमतरता असल्याचा रुग्णांचा आणि नातेवाईकांचा आरोप आहे. त्यातच रुग्णालयात वेळेवर औषध न मिळाल्याने रुग्णांचाही जीव धोक्यात येत आहे. जवळपास कोणतीही खासगी फार्मसी (Medical) नसल्याने रुग्णांच्या नातेवाईकांना मडगाव शहरात येऊन औषधांची शोधाशोध करावी लागत आहे. मडगावमधील वाहतूक कोंडीवर मात करत रुग्णांचे नातेवाईक तारेवरची कसरत करत असल्याचं चित्र आहे.

काही महिन्यांपूर्वी होस्पिसिओ नवीन जिल्हा रुग्णालयात (Hospital) स्थानांतरित करण्यात आले होते. रुग्णालयात कडक सुरक्षाव्यवस्था ठेवण्यात आली आहे. पत्रकारांनाही परवानगीशिवाय रुग्णालयांच्या अधिष्ठात्यांशी बोलता किंवा भेटता येत नाही. मात्र आरोग्य सेवेच्या बाबतीत सावळागोंधळ असल्याचा आरोप नातेवाईकांकडून होऊ लागला आहे. महत्त्वाची बाब म्हणजे सुरक्षेवर इतका खर्च करुनही रुग्णालयात रुग्णांना (Patient) औषधच मिळत नसल्याने संताप व्यक्त केला जात आहे. दरम्यान आरोग्य संचालक डॉ. इरा आल्मेदा यांनी हे सर्व आरोप फेटाळले आहेत.