Mayem Sport Ground :

डिचोली, स्थानिक खेळाडूंसाठी वरदान ठरलेल्या केळबायवाडा-मये येथील क्रीडा मैदानाला आता ‘अच्छे दिन’ येणार आहेत. क्रीडा आणि युवा व्यवहार खाते तसेच क्रीडा प्राधिकरणातर्फे सुमारे ५० लाख रुपये खर्चून या मैदानाची सुधारणा करण्यात येणार आहे.

शुक्रवारी (ता.१) स्थानिक आमदार प्रेमेंद्र शेट यांच्या उपस्थितीत या कामाचा शुभारंभ करण्यात आला. यावेळी जिल्हा पंचायत सदस्य शंकर चोडणकर, क्रीडा खात्याचे साहाय्यक अभियंता तिळवे, भाजप मंडळ अध्यक्ष दयानंद कारबोटकर, मयेचे सरपंच विद्यानंद कारबोटकर, उपसरपंच सुफला चोपडेकर, पंचसदस्य सीमा आरोंदेकर,

कृष्णा चोडणकर, वासुदेव गावकर, कनिवी कवठणकर, माजी सरपंच विजय पोळे, चोडणचे सरपंच रवींद्र किनळकर आदी उपस्थित होते. शंकर चोडणकर यांनीही यावेळी विचार मांडले. क्रीडा मैदानाचा विकास होत असल्याबद्दल त्यांनी समाधान व्यक्त केले.

चामेरे मैदानाचाही होणार विकास

गावातील खेळाडूंना चांगल्या सुविधा उपलब्ध व्हाव्यात, क्रीडा क्षेत्रात पुढे येण्याची संधी मिळावी, यासाठी सरकारचे प्रयत्न सुरू आहेत.

त्याच दृष्टीकोनातून मयेत क्रीडा मैदानाचा विकास करण्यात येणार आहे, असे प्रेमेंद्र शेट म्हणाले. यावेळी त्यांनी मुख्यमंत्री डॉ. सावंत आणि क्रीडामंत्री गावडे यांना धन्यवाद दिले. मये मतदारसंघातील चामेरे क्रीडा मैदानाचाही विकास करण्यात येणार असल्याचेही त्यांनी सांगितले.

नव्या सोयी-सुविधा होणार उपलब्ध

साडेआठ वर्षांपूर्वी तत्कालीन आमदार स्व. अनंत शेट यांच्या पुढाकारातून या मैदानाची बांधणी करण्यात आली होती.

जून २०१५ मध्ये या मैदानाचे लोकार्पण करण्यात आले. मात्र, मध्यंतरी देखभालीकडे दुर्लक्ष झाल्याने या मैदानाच्या संरक्षक भिंतींची मोडतोड झाली आहे. आता या मैदानाला पुन्हा नवा साज देण्यात येणार आहे. या मैदानावर खेळाडूंना सोयी-सुविधा पुरविण्यात येणार आहेत.