डिचोली: पावसाच्या तडाख्यात मये येथील तलावाकडील रस्ता खचला असून, दुरुस्तीचे काम केल्यानंतर महिनाभरातच कामाचा निकृष्टपणा समोर आला आहे. श्री तळेश्वर मंदिरासमोर तर मोठी समस्या निर्माण झाली आहे. ज्या ठिकाणी रस्ता खचला आहे, त्या ठिकाणी सध्या या रस्त्यावर चिखलाची दलदल झाली असून, वाहतुकीस मोठी समस्या निर्माण झाली आहे.

सध्या या दलदलमय रस्त्यावरून विशेष करून दुचाकी वाहने चालविताना वाहनचालकांना कसरत करावी लागत आहे. त्यांना अक्षरशः जीव मुठीत धरून प्रवास करावा लागत आहे. बुधवारी दिवसभर पडलेल्या पावसात चिखलाच्या दलदलीमुळे दोन-तीन दुचाकी घसरण्याच्या घटना घडल्या. मात्र, कोणताही अनर्थ घडला नाही, अशी माहिती घटनास्थळावरून मिळाली आहे.

गेल्या मे महिन्यात जलस्रोत खात्यातर्फे मये तलावाकडील रस्त्याखालील बांधाची दुरुस्ती करण्यात आली आहे. दुरुस्ती करताना बांधाच्या दोन्ही बाजूंनी रस्ता खोदून मोठे पाइप घालण्यात आले आहेत.

या कामानिमित्त जवळपास पंधरा दिवस रस्ता वाहतुकीस बंदही करण्यात आला होता. मे महिन्याच्या शेवटच्या आठवड्यात रस्ता वाहतुकीस खुला करण्यात आला होता. त्यानंतर या रस्त्यावरून वाहतूक सुरळीतपणे सुरू होती. मात्र, जोरदार पावसामुळे आता समस्या निर्माण झाली आहे. पाइप घातल्यानंतर खोदलेले चर व्यवस्थित बुजवले नसल्यामुळे जोरदार पावसाच्या तडाख्यात दोन्ही बाजूंनी रस्ता खचला आहे.