डिचोली/शिवोली: डिचोली बसस्थानकाजवळील बगलमार्गालगत पडलेल्या कचऱ्याला अचानक भीषण आग लागल्याची घटना आज (१५ फेब्रुवारी ) घडली. तर दुसरीकडे, शिवोलीमधील दांडा येथे एका घराला अचानक आग लागल्याची माहिती समोर आलीय.

डिचोली बसस्थानकाजवळील बगलमार्गालगत पडलेल्या कचऱ्याला अचानक लागलेल्या आगीचं कारण अद्याप स्पष्ट झालेले नाही. मात्र, सुक्या कचऱ्यामुळे आगीने वेग घेतला आणि काही वेळातच मोठ्या भागात पसरली.

घटनेची माहिती मिळताच, अग्निशमन दलाच्या जवानांनी तातडीने घटनास्थळी धाव घेतली आणि आगीवर नियंत्रण मिळवण्यासाठी शर्थीचे प्रयत्न सुरू केले.

तीन तासांनी आग आटोक्यात

अग्निशमन दलाला आग विझवण्यासाठी तब्बल तीन तासांचा कालावधी लागला. या दरम्यान, परिसरातील नागरिकांनीही सहकार्य करून आग विझवण्यास मदत केली. सुदैवाने, या दुर्घटनेत कोणतीही जीवितहानी झाली नाही. मात्र, मोठ्या प्रमाणात धूर पसरल्यामुळे स्थानिक नागरिकांना त्रास सहन करावा लागला.

या प्रकारानंतर स्थानिक प्रशासनाने सार्वजनिक ठिकाणी कचरा न टाकण्याचे आणि योग्य पद्धतीने कचऱ्याची विल्हेवाट लावण्याचं आवाहन केलं आहे.

शिवोलीमध्ये घराला आग

दुसरीकडे, शिवोलीमधील दांडा येथे एका घराला अचानक आग लागली. या दुर्घटनेत ५ लाख रुपयांचे नुकसान झाल्याची माहिती आहे. घटनेची माहिती मिळताच स्थानिक रहिवाशांनी तातडीने अग्निशमन दलाला कळवले.

अग्निशमन दलानं वेळेत घटनास्थळी पोहोचून आगीवर नियंत्रण मिळवलं. आग लागण्याचे नेमकं कारण अद्याप स्पष्ट झालेलं नाही. प्रशासनानं नुकसानीचा आढावा घेतला असून अधिक तपास सुरू आहे.