Margao Police: अनंत चतुर्दशीच्‍या दिवशी होणारे 11 व्‍या दिवसांच्‍या गणेश विसर्जनाची मिरवणूक आणि महमंद पैगंबर जयंतीनिमित्त मडगावात मुस्‍लिम समाजाकडून काढण्‍यात येणारा जुलूस, या दोन्‍ही मिरवणुका २८ सप्‍टेंबर रोजी एकाच दिवशी येत असल्‍याने या मिरवणुकीच्‍यावेळी अनुचित प्रकार घडू नये, यासाठी मडगाव पोलिसांनी खबरदारीचे उपाय घेतले आहेत.

त्‍याचाच एक भाग म्‍हणून सासष्‍टीचे पोलिस उपअधीक्षक संतोष देसाई यांनी आज जामा मशिदीच्‍या पदाधिकाऱ्यांबरोबर बैठक घेतली. जुलूस सांयकाळी 6 वाजेपर्यंत आटोपता घ्यावा,अशी सूचना आयोजकांना करण्‍यात आली.

यावेळी जामा मशिदीचे अध्‍यक्ष उर्फान मुल्‍ला आणि अन्‍य पदाधिकारी उपस्‍थित होते. उद्या 26 सप्‍टेंबर रोजी या जुलूसचा मार्ग ठरविण्‍यासाठी दक्षिण गोवा जिल्‍हाधिकाऱ्यांबरोबर बैठक ठेवण्‍यात आली आहे. दरवर्षी ही जुलूसची मिरवणूक मालभाट येथील जामा मशिदीकडून सुरू होते आणि हॉस्‍पिसियो मार्गे रवींद्र भवनकडे जाऊन तिथे तिचे विसर्जन होते.

ही मिरवणूक सायंकाळी 6 वाजेपर्यंत आटोपती घ्‍यावी, अशी विनंती उपअधीक्षक देसाई यांनी मुस्‍लीम प्रतिनिधींना केली. जेेणेकरून सायंकाळी सहा वाजल्‍यानंतर सुरु होणार्‍या गणेश विसर्जन मिरवणुकीत त्‍याचा व्‍यत्‍यय येणार नाही.

लोकांनी गर्दी टाळावी !

यंदाच्‍या जुलूस व विसर्जन मिरवणुकीला लोकांनी गर्दी करणे टाळावे, तसेच या मिरवणुकीत जी वाहने चालविली जातात ती नियंत्रितरित्‍या चालविली जावीत, अशीही सूचना करण्‍यात आल्‍याचे पोलिस उपअधीक्षक संतोष देसाई यांनी सांगितले.