सासष्टी: मडगाव ते कुंकळ्ळी राष्ट्रीय महामार्ग ६६ च्या रुंदीकरणाची प्रक्रिया सुरू आहे. हे रुंदीकरण लोकांची जी घरे व वस्ती आहे, तेथूनच केले जाणार आहे. त्यास लोकांचा विरोध आहे. जर रस्ता रुंद केला तर येथील ग्रामस्थांना अडचणीचे ठरणार आहे, त्याबाबत चिंचोणे सरपंच, पंच सदस्यांनी आमदार सिल्वा यांच्याशी रूंदीकरणानंतरच्या दुष्परिणामाबाबत चर्चा केली.

स्थानिकांनी दुसऱ्या बाजूने रस्त्यासाठी पर्यायी जागा दाखवली आहे. पण अजून त्यावर काहीही निर्णय झालेला नाही. त्यासाठी स्थानिकांनी रस्त्यावर एकत्रित होऊन आपला निषेध व्यक्त केला. यावेळी आमदार क्रुझ सिल्वा, चिंचोणेचे सरपंच फ्रॅंक व्हिएगश व पंच सदस्य उपस्थित होते.

आमदार क्रुझ सिल्वा म्हणाले, आपण या संदर्भात सार्वजनिक बांधकाम मंत्री दिगंबर कामत यांच्याकडे चर्चा केली आहे. आम्ही सरकारला या संदर्भात भूमिका काय? ते स्पष्ट करण्यास सांगितले आहे. या रस्त्यासाठी निविदा जाहीर केली आहे. जर रस्ता याच बाजूने करण्याचा निर्णय घेतला, तर सर्व लोक रस्त्यावर येतील, त्यांना आपला पाठिंबा असेल.

सरपंच फ्रॅंक व्हिएगश म्हणाले, मंत्री नितीन गडकरी यांची भेट घेऊन सुद्धा त्यांना याबद्दलच्या परिस्थितीची माहिती दिली आहे. मुख्यमंत्र्यांनी आम्हांला रुंदीकरणासाठी जी पर्यायी जागा दाखवली आहे, ती कोमुनिदादची आहे. कोमुनिदादकडून ‘ना हरकत’ दाखला सादर करण्यास सांगितले. आम्ही तो दाखला सुद्धा सादर केला आहे. मात्र सरकार अजून त्यावर काहीही निर्णय घेत नाही, असे व्हिएगश यांनी सांगितले

जनमताचा आदर करा!

मनीषा पै या स्थानिक महिलेने सांगितले, की हा प्रश्न २००३ पासून सुरू आहे. आम्ही जी पर्यायी जागा दाखवली आहे, तेथील लोकांना सुद्धा रस्ता गेल्यास हरकत नाही. अशा परिस्थितीत सरकार विलंब का करीत आहे, हेच कळत नाही. सरकारने जनमताचा आदर करावा, त्यानुसार कृती करायला हवी.