Margao Businessman Dies in Karwar Railway Accident

मडगाव: आपल्या पत्नीसमवेत केरळ येथील शबरीमाला येथे देवदर्शनासाठी निघालेले रामानंद रायकर (५५) या मडगावातील टेम्पो ट्रॅव्हल व्यावसायिकाचा गुरुवारी (ता. १३) रात्री साडेआठच्या दरम्यान कारवार रेल्वे स्थानकावर रेल्वेखाली चिरडून मृत्यू झाला.

मिळालेल्या माहितीनुसार कारवार रेल्वे स्थानकावर रेल्वेने थांबा घेतल्यानंतर रायकर हे पाण्याची बाटली आणण्यासाठी रेल्वेतून खाली उतरले होते. काही वेळाने रेल्वे पुढील प्रवासासाठी निघाली असता, रेल्वे पकडण्यासाठी ते धावत आले व धावत्या रेल्वेत त्यांनी चढण्याचा प्रयत्न केला.

परंतु या गडबडीत ते खाली पडले व रेल्वे अंगावरून गेल्याने ते जागीच ठार झाले. कारवार कोंकण रेल्वे पोलिसांनी घटनेचा पंचनामा करून अनैसर्गिक मृत्यू म्हणून हे प्रकरण नोंदवून घेतले आहे. 

रायकर हे पूर्वी कोंब येथे राहत होते. सध्या त्यांचे वास्तव पांडवा कपेल येथे होते, अशी माहिती त्यांच्या निकटवर्तीयांकडून देण्यात आली. त्यांचा टेम्पो ट्रॅव्हलचा व्यवसाय होता.