सासष्टी: दक्षिण-पश्चिम रेल्वेकडून तिनईघाट ते वास्को रेल्वेस्थानकापर्यंत सुरू असलेले रेल्वे दुपदरीकरणाचे काम सावर्डे ते माजोर्डापर्यंत पूर्ण झाले आहे. आज रेल्वे सुरक्षा आयुक्तांनी सावर्डे ते मडगावपर्यंत रेल्वेमार्गाची चाचणी केली. सकाळी रेल्वेची मोटर ट्रॉली आणि सायंकाळी प्रवासी रेल्वेची स्पीड ट्रायल घेण्‍यात आली. हा चाचणी अहवाल दक्षिण-पश्चिम रेल्वेला सादर केल्यावर या रुळाची पुन्हा पाहणी करून पंधरा ते वीस दिवसांच्या आत हा मार्ग रेल्वे वाहतुकीसाठी खुला करण्यात येणार आहे.

दक्षिण-पश्चिम रेल्वेच्या वतीने तिनईघाट ते वास्को रेल्वे स्थानकापर्यंत दुपदरीकरणाचे काम सुरू आहे. माजोर्डा ते वास्कोपर्यंतच्‍या रेल्वे दुपदरीकरणाच्‍या कामाला नागरिकांकडून तीव्र विरोध करण्यात येत असल्यामुळे तसेच कुळे ते सावर्डेपर्यत काही भागात वनखात्याची परवानगी अद्याप न मिळाल्याने रेल्वे दुपदरीकरणाचे काम थांबले आहे. सावर्डे, चांदर ते माजोर्डापर्यंत उभारलेल्या रेल्वेमार्गाची लांबी 15. 64 किलोमीटर एवढी असून, या मार्गाची आज चाचणी करण्यात आली. ही चाचणी रेल्वे विकास निगम लिमिटेडचे सरव्यवस्थापक शशिभूषण साहू, रेल्‍वे सुरक्षा आयुक्त ए. के. राय, हुबळी रेल्‍वे विभागीय व्‍यवस्‍थापक अरविंद नालखेडे व अधिकाऱ्यांकडून करण्यात आली.

रेल्वे सुरक्षा आयुक्तांनी सकाळी सावर्डे ते मडगावपर्यंत मोटर ट्रॉलीने चाचणी केली व संध्याकाळी या मार्गावर प्रवासी रेल्वे प्रतिघंटा 124 कि.मी. वेगाने नेऊन स्पीड ट्रायल घेतली. या रेल्‍वेमार्गावर प्रवाशांच्या दृष्टिकोनातून सुधारणा करण्याची गरज आहे. त्या अनुषंगाने अहवाल तयार करून दक्षिण-पश्चिम रेल्वेला पाठविण्यात येणार आहे. अहवालानुसार काही सुधारणा करण्याची गरज असल्यास त्या केल्यावर या रेल्वेमार्गाची पुन्हा पाहणी करून पंधरा ते वीस दिवसांत हा मार्ग रेल्वे वाहतुकीसाठी खुला करण्यात येणार आहे.