फातोर्डा : आकेपासून पॉवर हाऊसकडे जाणाऱ्या रिंगरोडच्या बाजूला वारंवार कचऱ्याच्या राशी निर्माण होत आहेत. त्यामुळे दक्षिण गोवा जिल्हा दंडाधिकाऱ्यांनी हा रिंगरोड दररोज संध्याकाळी ७ ते सकाळी ७ या वेळेत बंद करण्यासाठी अधिसूचना जारी करण्याविषयी मुख्याधिकारी मॅन्युएल बार्रेटो यांनी विनंती केली आहे.

हा रस्ता आके येथील अग्निशमन दलाच्या कार्यालयामागून पॉवर हाऊस जंक्शनकडे जाण्यासाठी बाह्य रस्ता आहे. सिने विशांतपासून पॉवर हाऊसकडे जाण्यासाठी असलेल्या मुख्य रस्त्यावर वाहतुकीची कोंडी झाल्यास या रस्त्याचा वापर अनेक वाहनचालक करतात. मात्र, रात्रीच्या वेळी काही वाहनचालक अंधाराचा फायदा घेऊन या ठिकाणी कचरा टाकतात. त्यामुळे या ठिकाणी कचऱ्याचे डोंगर साचले आहेत.

मडगावचे आमदार दिगंबर कामत आणि मडगावचे मुख्याधिकारी बार्रेटो यांनी जिल्हा दंडाधिकाऱ्यांसोबत घेतलेल्या संयुक्त बैठकीवेळी जिल्हा दंडाधिकाऱ्यांना पत्र पाठवण्याचा निर्णय घेण्यात आला. रिंगरोडच्या कडेला कचरा टाकणाऱ्यांना पकडण्यासाठी पालिकेने यापूर्वी अनेकदा प्रयत्न केले होते. परंतु रस्त्याकडेला पथदीप नसल्याने अज्ञात व्यक्ती रात्री उशिरा किंवा पहाटेच्या वेळेस कचरा टाकतात. त्यामुळे येथे दुर्गंधी पसरली आहे.

सुशोभीकरणाच्या कामात अडथळे

या रिंगरोडच्या बाजूला नव्याने बांधण्यात येत असलेल्या वॉकिंग ट्रॅकच्या सुशोभीकरणाचे काम सार्वजनिक बांधकाम खात्यातर्फे हाती घेतले आहे. परंतु लोकांकडून सतत कचरा टाकण्याच्या प्रकारामुळे या कामात अडथळे निर्माण होत असल्याचे त्यांनी नगरपालिकेच्या अधिकाऱ्यांच्या निदर्शनास आणून दिले आहे.