मडगाव: दोन वर्षांपूर्वी मडगावात घडलेल्या बलात्कारप्रकरणी पोलिसांनी पप्पूजी तिवारी या संशयिताविरोधात गुन्हा दाखल करून पुढील तपासास सुरवात केली आहे. सुरवातीला या प्रकरणाची तक्रार उत्तर प्रदेशातील बलरामपूर येथे नोंदविण्यात आली होती. मात्र, बलात्काराची घटना मडगावात घडल्याने ही तक्रार तेथून मडगाव पोलिस ठाण्यात वर्ग करण्यात आली आहे.

संशयिताविरोधात भारतीय दंड संहितेच्या कलम ५०६, ४२०, ४०६, ३८४, ३७६ व ३२८ अंतर्गत गुन्हा दाखल करण्यात आला आहे. पोलिस निरीक्षक अरुण गावस-देसाई यांच्या मार्गदर्शनाखाली उपनिरीक्षक अनुष्का परब पुढील तपास करीत आहेत.पोलिसांनी दिलेल्या माहितीनुसार, बलात्काराची ही घटना १५ जून २०२४ रोजी मडगाव रेल्वे स्थानकाजवळ घडली होती. पीडितेने दिलेल्या तक्रारीनुसार, संशयिताने तिला मादक पेय पाजून नंतर तिच्यावर बलात्कार केला. तसेच, तिच्याकडील १६ लाख रुपये हिसकावून पळ काढला.