मडगाव : मडगाव पालिकेने कचऱ्याच्या समस्येची गंभीर दखल घेत मडगावच्या रिंग रोडवरील कचरा साफ करण्यास सुरुवात केली आहे. पालिकेचे कर्मचारी शनिवारीपासून कचरा साफ करण्यात गुंतलेले दिसून आले.

घरातील सुका व ओला कचऱ्याचे वर्गीकरण न करणार्‍यांना 5,000 रुपये दंड आकारण्याचे स्पष्ट संकेत याआधीच मुख्याधिकारी रोहित कदम यांनी दिले होते. मात्र, नागरिकांनी याची दखल न घेता कचरा टाकणे सुरूच ठेवले.

पत्रकारांशी बोलताना पालिका कर्मचारी रवी नाईक यांनी सांगितले की, रिंगरोडच्या कडेला टाकलेला कचरा त्यांनी साफ केला आहे. "वास्तविक, आम्ही या भागातून नियमितपणे कचरा उचलतो, मात्र दुसऱ्या दिवशी पुन्हा कचरा आढळतो," नाईक म्हणाले. आजूबाजूच्या गावातील लोक हा कचरा रस्त्याच्या कडेला टाकतात, असा त्यांचा संशय आहे.