Margao Municipal Driver Dies: मडगाव येथे रविवारी (2 नोव्हेंबर) मध्यरात्री कोकण रेल्वे स्थानकाजवळ दुर्देवी अपघात झाला. या अपघातात परशुराम तलवार (वय 38) या दुचाकीस्वार तरुणाचा मृत्यू झाला. परशुराम हा मडगाव नगरपालिकेत चालक (Driver) म्हणून कार्यरत होता.

पोलिसांनी दिलेल्या माहितीनुसार, रविवारी रात्री उशिरा परशुराम हा आपल्या मोटारसायकलवरुन जात असताना, समोरुन येणाऱ्या दुसऱ्या दुचाकीने त्याच्या वाहनाला जोरदार धडक दिली. धडक इतकी जबरदस्त होती की, परशुराम गंभीररित्या जखमी झाला.

अपघातानंतर त्याला तातडीने साऊथ गोवा जिल्हा रुग्णालयात (South Goa District Hospital) दाखल करण्यात आले. मात्र, त्याची प्रकृती चिंताजनक असल्याने पुढील उपचारांसाठी त्यांना गोवा मेडिकल कॉलेज (Goa Medical College) येथे हलवण्यात आले. मात्र दुर्दैवाने उपचारादरम्यान परशुरामचा मृत्यू झाला.

या अपघाताला (Accident) कारणीभूत असलेल्या दुसऱ्या दुचाकीस्वाराचा शोध पोलीस घेत आहेत. अपघातानंतर तो दुचाकीस्वार घटनास्थळावरुन फरार झाला. मडगाव पोलीस या घटनेची नोंद करुन पुढील तपास करत आहेत. परशुरामच्या निधनाने मडगाव नगरपालिकेतील कर्मचाऱ्यांमध्ये आणि त्याच्या कुटुंबियांवर शोककळा पसरली आहे.