सासष्टी: वायफाय बिलासंदर्भात नगराध्यक्ष दामोदर शिरोडकर व माजी मुख्याधिकारी गौरीश शंखवाळकर यांची मते वेगवेगळी असल्याने या प्रकरणी गूढ अजूनही कायम आहे. या बिलासंदर्भात दोघेही एकमेकावर आरोप करीत आहेत व दोष देत आहेत.

माजी मुख्याधिकारी शंखवाळकर सांगतात की, योगेश शेटकरने सांगितल्याप्रमाणे आपण हे पैसे त्याला दिले असे कॅशिअरने आपल्याला सांगितले. तरीही आपण कॅशिअरला मेमो दिला आहे, कारण यात कॅशिअरची सुद्धा चूक आहे. आम्ही वायफाय रेल इंडिया या रेल्वे कंपनीकडून घेतल्याचे माजी मुख्याधिकारी सांगतात.

नगराध्यक्ष दामोदर शिरोडकर यांनी सांगितले की, मुख्याधिकाऱ्यांनी पैसे योगेशला द्यायला सांगितले होते, असे कॅशिअरने आपल्याला सांगितले. शिवाय ज्या कंपनीकडून वाय फाय सेवा घेतली ती कंपनी सुद्धा बोगस असल्याचे नगराध्यक्षांनी सांगितले.

खरा कोण...?

नगराध्यक्षांनी सांगितले की, मुख्याधिकारी असताना शंखवाळकर यांनी नगरपालिकेत अनेक गैरप्रकार करून ठेवलेले आहेत. काहीजणांनी त्यांच्या विरोधात दक्षता खात्याकडे तक्रारही केली आहे. आपले त्यांच्याकडे काहीही वैर नसून केवळ मुख्याधिकारी म्हणून त्यांची भूमिका चुकीची होती हेच आपल्याला सांगायचे आहे. साडेसतरा लाख रुपयांच्या गैरप्रकाराबाबत बोलताना नगराध्यक्षांनी सांगितले की, योगेश शेटकरकडून ही सर्व रक्कम वसूल केल्याशिवाय आपण स्वस्थ बसणार नाही. अतिरिक्त ताबा असलेले मुख्याधिकारी अजित पंचवाडकर यांना सुद्धा या प्रकरणी कारवाई करण्यास सांगणार असल्याचे नगराध्यक्षांनी सांगितले.