Margao Municipal Council

सासष्टी: ‘स्वच्छता ही सेवा’ अभियानाअंतर्गत पुढील पंधरा दिवसांत सर्व प्रभाग स्वच्छ करण्याची शपथ मडगाव नगरपालिकेने घेतली आहे. सर्व नगरसेवकांशी चर्चा करून व त्यांना विश्‍‍वासात घेऊन हा निर्णय घेण्‍यात आला आहे.

प्रत्येक प्रभागांमध्ये स्वच्छतेसाठी मजूर पाठविले जातात. ही पद्धत तात्पुरती बंद ठेवण्यात येईल, जेणेकरून सर्व मजूर व वाहने संपूर्ण शहराच्या स्वच्छतेसाठी गुंतविले जातील.

याबाबत बोलताना नगराध्यक्ष दामोदर शिरोडकर यांनी सांगितले की, स्वच्छता मोहीम यापूर्वीच सुरू झाली आहे. नगरपालिका बाग, शहरातील जलस्त्रोत, गणपती विसर्जन ठिकाणे स्वच्छ करण्यात आली आहेत.

नगरपालिका मार्केटमध्ये स्वच्छता मोहीम हाती घेतली जाईल. त्याचप्रमाणे शहरातील शाळा व महाविद्यालयांमध्येही ही मोहीम राबवली जाईल. याच अभियानाअंतर्गत नगरपालिकेतर्फे वैद्यकीय शिबिर आयोजित केले जाईल असेही नगराध्‍यक्ष शिरोडकर यांनी सांगितले.

दरम्‍यान, सर्व नगरसेवक, कर्मचारी व मुख्याधिकारी अजित पंचवाडकर शपथ घेण्याच्या या कार्यक्रमात सहभागी झाले होते.

एकजुटीने समस्या मांडत राहू : नायक

मडगावचा आवाज ऐकून अखेर अधिकाऱ्यांना जाग आल्यासारखे दिसत आहे. ही फक्त एक सुरूवात आहे. एकजुटीने आमच्या समस्या मांडत राहू आणि चुकीच्या कृत्यांसाठी जबाबदार असलेल्या सर्वांना जाब विचारू.

चला जागृत राहून मडगावला सुरक्षित, स्वच्छ आणि हरित शहर म्हणून बदलण्यासाठी काम करूया, असे आवाहन युवा नेते प्रभव नायक यांनी आपली प्रतिक्रिया व्यक्त करताना केले.