मडगाव: अगोदर इन्स्टाग्रामवर मैत्री करून नंतर एका २४ वर्षीय युवतीला ३.३० लाखांना गंडा घालण्याची घटना मडगाव पोलिस ठाण्याच्या हद्दीतील पाजीफोंड येथे घडली. या प्रकरणी पोलिसांनी साई सुनील दळवी (२८) या युवकाला अटक केली आहे. सध्या त्याची कसून चौकशी सुरू आहे.

ममता जयसिंग राजपूत ही युवती तक्रारदार असून, संशयित कुडचडे येथील मोरायले येथील आहे. चालू वर्षाच्या ४ ते १६ एप्रिलदरम्यान ही फसवणुकीची घटना घडली होती. संशयित साई याने तक्रारदार युवतीशी इन्स्टाग्रामवरून मैत्री केली.

नंतर तिला मोठ्या रकमेचे आमिष दाखवून आपल्या व अन्य पाच जणांच्या बँक खात्यांवर रक्कम भरण्यास सांगितली. त्या युवतीने ती रक्कम भरली. मात्र मागाहून आपण फसविले गेल्याचे समजातच तिने पोलिसांत रीतसर तक्रार दाखल केली.

त्‍यानुसार पोलिसांनी संशयिताला अटक केली. त्‍याच्‍याविरोधात भारतीय न्‍यायदंड संहितेच्या कलम ३१८ (४) व माहिती तंत्रज्ञान कायदा कलम ६६ (ड) नुसार गुन्हा नोंद केला आहे. पोलिस निरीक्षक सूरज सामंत यांच्या मार्गदर्शनाखाली पुढील तपास सुरू आहे.