म्हापसा : मनोज बाम (30) याच्‍या खूनप्रकरणी पसार असलेला संशयित सूरज तीर्थ चंदन (ओडिशा) याला म्हापसा पोलिसांनी ओडिशा येथून अटक केली. अवघ्या पाच दिवसांत पोलिसांनी या प्रकरणाचा छडा लावला. 15 मे रोजी फ्रेतसवाडा-वेर्ला, काणका येथे कौटुंबिक वादातून ही घटना घडली होती.

मनोजवर प्राणघातक हल्ला करून संशयित सूरज गावी पसार झाला होता. घटनेच्या दिवशी मनोज याच्यासह संशयिताचे कुटुंबीय खोलीत झोपले होते. ही संधी साधून सूरज याने बागकामासाठी वापरण्यात येणाऱ्या पिकासवजा हत्याराद्वारे मनोजच्या डोक्यावर वार केला होता. या हल्ल्यात तो रक्तबंबाळ होऊन बेशुद्धावस्थेत पडला. हल्ल्यानंतर संशयित पसार झाला होता.

दरम्यान, जखमी अवस्थेत मनोजला उपचारासाठी जीएमसीत दाखल करण्यात आले होते. पण तेथे त्‍याचा मृत्‍यू झाला. दुसरीकडे संशयिताला पकडण्यासाठी पोलिसांनी विशेष पथकाची स्थापना केली होती.

संशयित आपल्या मूळ गावी गेल्याचे समजताच त्याला तेथे जाऊन अटक करण्‍यात आली. पोलिस निरीक्षक परेश नाईक यांच्या मार्गदर्शनाखाली उपनिरीक्षक योगेश गडकर पुढील तपास करीत आहेत.